Нуучча тылынанАнал бырайыактар
Тылы уларыт
УРУБИИКИ ТУҺУНАН

Жиркова Татьяна Юрьевна

Татьяна Юрьевна Жиркова — Россия спордун үтүөлээх маастара, сүүрүүк, 100 км сүүрүүгэ Аан дойду үс төгүллээх, Европа икки төгүллээх чемпионката, чэпчэки атлетикаҕа тренер.

Олоҕун олуктара

1970 сыллаахха атырдьах ыйын 28 күнүгэр Мэҥэ Хаҥалас Төҥүлү с. төрөөбүтэ. Павловскай орто оскуолатын бүтэрбитэ. Бастакы тренерэ Павловскай оскуолатын физкультураҕа учуутала А. Н. Осипов. Дьокуускайдааҕы медицинскэй училищеҕа үөрэнэ сылдьан, хайыһарга республика үтүөлээх тренерэ П. П. Харитоновка дьарыктанан, спорт маастарыгар кандидат нуорматын толорбута, сүүрүүгэ ДьТХА тренерэ А. Н. Ивановка дьарыктаммыта. Кэлин ХИФУ физкультура уонна спорт институтун бүтэрбитэ.

Спортка карьератын 2012 с. түмүктээбитэ[3].

Билиҥҥи кэмҥэ Саха Өрөспүүбүлүкэтин сүүмэрдэммит хамаандаларын спортивнай бэлэмнэниилэрин Киинигэр чэпчэки атлетикаҕа старшай тренеринэн үлэлиир. Олимпия оонньууларын кыттыылааҕын (2024), Азия оонньууларын боруонса призерын (2023), марафоҥҥа Арассыыйа биэс төгүллээх чемпионкатын Сардаана Трофимова тренерэ. 100 км сүүрүүгэ Россия икки төгүллээх чемпионкатын Изабелла Борисованы, сууккаҕа сүүрүүгэ Россия чемпионкатын Надежда Буту, марафоҥҥа Россия чемпионаттарын кыайыылааҕын уонна призерын Алена Татаринова-Узнаеваны уо. д. а. дьарыктыыр[4].

Спортка ситиһиилэрэ

  • 1986 с. — Саха АССР норуоттарын Спартакиадатын кыайыылааҕа;
  • 1996, 2000, 2003, 2006 сс. — Саха сирин норуоттарын оонньууларын кыайыылааҕа;
  • 1996 с. — элбэх күннээх сүүрүүгэ СР спордун маастара.
  • 1999 с. — классическай марафоҥҥа (42 км 195 м) Россия спордун маастара.
  • 2002 с. — 100 км сиргэ аан бастаан Россия чемпионатыгар кыттан 7:45.29 сөк биэтэккэ иккис кэлэн, норуоттар икки ардыларынааҕы кылаастаах маастар нуорматын 15 мүн курдугунан куоһарар.
  • 2002 с. — 100 км 7:37.06 сөк кэлэн, аан дойду чемпионката (Бельгия, Торхут к.).
  • 2003 с. — 100 км 7:19.51 сөк кэлэн, Европа чемпионката уонна рекордсменката (Россия).
  • 2004 с. — 100 км 7:10.31 с Европа саҥа ре-кордун олохтуур уонна Аан дойдуга 2 төгүл бастыыр (Голландия, Винсхотен к.).
  • 2006 с. кулун тутар — 56 км сири 3:56.00 сек кэлэн, Соҕуруу Африкада «Икки акыйаан» диэн аан дойдуга иккис таһымнаах улахан сүүрүү кыайыылааҕа.
  • 2006 с. бэс ыйа — 89 км 900 м 5:58.50 сөк кэлэн, Соҕуруу Африкаҕа сыл аайы ыытыллар «Комрадс» Аан дойду саамай улахан бириистээх суперпробегын кыайыылааҕа.

100 км Аан дойду 2 төгүллээх уонна Европа чемпионката, рекордсменката, Соҕуруу Африкаҕа «Комрадс» уонна «Икки акыйаан» Аан дойду 15-тии тыһыынча киһи кыттыылаах профессионал супермарафонецтарын саамай улахан сырсыыларын кыайыылааҕа[4][5].

Наҕараадалара

Россия спордун үтүөлээх маастара[6], СӨ физическэй култууратын уонна спордун үтүөлээх үлэһитэ, СӨ доруобуйатын харыстабылын туйгуна, Доллу уонна Мэҥэ-Хаҥалас улууһун нэһилиэгин бочуоттаах гражданина[7].

Татьяна Жиркова аатын «Россия Бастыҥ дьоно» кинигэҕэ киирбит.

2000, 2004, 2006, 2008 сс. Саха сиригэр сыл бастыҥ спортсменкатын аатын ылбыта.

Норуоттар икки ардыларынааҕы супермарафон Ассоциациятыттан «Супермарафон устуоруйатыгар Үс төгүллээх Соҕотох Аан Дойду Чөмпүйүөнэ» диэн суруктаах анал сертификатынан наҕараадаламмыта[4].

Билинии

  • 2025 сылтан Мэҥэ-Хаҥалас улууһун Майа сэлиэнньэтигэр Татьяна Жиркова аатынан Майа марафона ыытыллар[8].
undefined

Быһаарыылар

  1. ↑ World Athletics Database
  2. ↑ Tatyana Zhyrkova // World Athletics Database
  3. ↑ Татьяна Жиркова уходит из спорта: Проводы (рус.). РИГ SAKHAPRESS.RU. Сигэнии күнэ: 4 Тохсунньу 2026.
  4. ↑ 1 2 3 Суперзвезда легкой атлетики отмечает юбилей (рус.) (4 Тохсунньу 2026).
  5. ↑ Tatyana ZHYRKOVA (рус.). World Athletics Confidentiality. Сигэнии күнэ: 4 Тохсунньу 2026.
  6. ↑ Татьяна Жиркова - Заслуженный работник физической культуры и спорта России (рус.). Спорт Якутии. Сигэнии күнэ: 4 Тохсунньу 2026.
  7. ↑ Почетные граждане Мегино-Кангаласского улуса (рус.). Спорт Якутии. Сигэнии күнэ: 4 Тохсунньу 2026.
  8. ↑ Майинский марафон имени Татьяны Юрьевны Жирковой | REGPLACE(биллибэт). REGPLACE. Сигэнии күнэ: 2 От ыйын 2026.

Категориялар