Еремеев Алексей Ильич
Алексей Ильич Еремеев (төр. 1973 сыл муус устар 27 күнэ, Нам) — Арассыыйа бэлиитигэ. Саха Сирин Ил Түмэн V, VI созыв дьокутаата[1]. 2021 сыл бэс ый 30 күнүттэн 2023 сылга диэри Саха сирин Ил Түмэн VI ыҥырыы бэрэссэдээтэлэ[2][3]. 2023 сыл балаҕан ыйын 25 күнүттэн Саха сирин Ил Түмэн VII ыҥырыы бэрэссэдээтэлэ[4].
Олоҕун олуктара
1995 сыллаахха Саха Судаарыстыбыннай университетыгар үрдүк үөрэх устуоруйа идэтигэр үөрэнэн бүтэрбитэ[5]. Ол сылга Нам улуус дьаһалтатыгар ыччат дьыалатын, спорт уонна туризм салааларын заведующай быһыытынан үлэлии киирбит. 1996 сыл олунньу ыйыттан улуус баһылыгын социальнай боппуруостарга солбуйааччыта[3].
2000 сылтан Өрөспүүбүлүкэ Бырабыыталыстыбатын аппараатыгар, онтон ыччат дьыалаларыгар миниистири бастакы солбуйааччынан, кэлин 2002 сылтан ыччат бэлиитикэтигэр, физкультураҕа уонна спорка миниистири солбуйааччынан үлэлээбитэ[5][6].
2010 сыллаахха Хотугулуу-Илиҥҥи федеральнай университиэккэ инновационнай салайыы бырайыактарын салаатыгар сүрүн исписэлииһинэн киирбитэ. 2013 сыллаахха ОАО «Аэропорт Якутск» генеральнай дириэктэр сүбэһитэ буолбута[2].
2013 сыллаахха V ыҥырыылаах Ил Түмэн дьокутаатынан талыллыбыт, V ыҥырыылаах судаарыстыбаннай тутуу уонна сокуону оҥоруу кэмитиэтин салайбыта. 2018 сыллаахха VI ыҥырыылаах Ил Түмэн дьокутаата буолбут, кэмитиэт салаайыччытын пуоһугар хаалар[7].
2021 сыл бэс ый 30 күнүгэр Ил Түмэн пленарнай мунньаҕар VI ыҥырыылаах өрөспүүбүлүкэ парламенын бэрэссэдээтэлинэн талыллыбыта. Кини «Биир ньыгыл Арассыыйа» баартыйа фракцията туруорбут кандидатуратын 57 дьокутаат өйөөбүтэ, биир дьокутаат утарбыта[8][1]. Бу дуоһунаска кини VI ыҥырыылаах өрөспүүбүлүкэ парламенын урукку спикерэ Пётр Гоголевы солбуйбут[9].
Алексей Еремеев 2023 сыл балаҕан ыйын 25 күнүгэр өрөспүүбүлүкэ VII ыҥырыылаах Ил Түмэн Бэрэссэдээтэлинэн талыллыбыта. «Биир Ньыгыл Арассыыйа» баартыйа фракциятыттан туруоруллубут хандьыдатураны 61 парламентарий өйөөбүтэ, алта киһи утары буолбута, биир киһи туттунубута[10].
Холуобунай дьыала
2009 сыллаахха Алексей Еремеевка уонна «Эдэр ыччат олорор комплекс» диэн олорор дьиэ тутар кооператив (ЖСК) бэрэссэдээтэлигэр Павел Семеновка дуоһунастарын аһара туттууга буруйдаан холуобунай дьыала тэриллибитэ. 2011 сыллаахха Дьокуускай куорат суута кинилэри штрафтаабыта уонна хаайыыга ыыппыта, ол эрээри бу бириигэбэр Өрөспүүбүлүкэ Үрдүкү Суутунан тохтотуллубута. Дьыала хаттаан көрүллүүтүгэр Дьокуускай куорат суута быыһыыр бириигэбэр таһаарбыта[11].
Наҕараадалара
- Саха Өрөспүүбүлүкэтин Бырабыыталыстыбатын Бочуоттаамаҕа суруга[12];
- Арассыыйа Федерациятын Үөрэҕин Министиэристибэтин Бочуоттаамаҕа суруга;
- Арассыыйа Федерациятын Ыччат политикатын эйгэтин Бочуоттаах үлэһитэ;
- Саха Өрөспүүбүлүкэтин Ил Дарханын Грамотата;
- Арассыыйа Федерациятын Федеральнай Мунньаҕын Сэбиэтин Бэрэссэдээтэлин Махтанааһына;
- «Саха Өрөспүүбүлүкэтин норуотун хаһаайыстыбатын Үтүөлээх үлэһитэ» диэн Бочуоттаах аат;
- Российскай Федерация Федеральнай Мунньаҕын Сэбиэтин Бочуоттаамаҕа суруга.