Гуринов Афанасий Гаврильевич
Гуринов Афанасий Гаврильевич — Арчылан (1962 сыл от ыйын 9 күнэ, Сунтаар, Саха АССР) — бэйиэт, прозаик, саха тылын уонна литературатын идэлээҕэ, суруналыыс.
Олоҕун олуктара
1962 сыллахха от ыйын 9 күнүгэр Сунтаар улууһун Сунтаар нэһилиэгэр элбэх оҕолоох ыалга төрөөбүтэ. 1979 сыллаахха орто оскуоланы Тойбохойго бүтэрбитэ, «Сунтаар» сопхуоска оробуочайдаабыта.
1980-82 сс. аармыйаҕа сулууспалаабыта. 1987 сыллаахха СПТУ-23 үөрэнэ киирбитэ, сварщик-сантехник уонна суоппар-слесарь идэлэрин баһылаабыта.
Саха тылын уонна литэрэтиирэтин идэтин СГУ-га 1994 с. ылбыта. СГУ-га Түүр тылларыгар аспиратуураҕа үөрэммитэ, саха тылын хаапыдыратыгар ассистеннаабыта. 2006 сыллаахтан «Күрүлгэн» уус-уран сурунаал уонна «Кыым» хаһыат «Кулуһун» уус-уран сыһыарыытын эрэдээктэрэ.
Бастакы хоһоонноро 1980-с сыллар бүтүүлэригэр Сунтаар хаһыатыгар, онтон «Кыым», «Эдэр коммунист» («Сахаада»), «Якутский университет» хаһыаттарга тахсыбыттара. 1990 с. «Сахаада» иһинэн тахсыбыт «Алыптаах түгэн» кинигэҕэ аан бастаан Арчылан диэн ааттаммыта.
Суруйааччылар сойуустарын норуоттар ыккардыларынааҕы түмсүүтүн, Саха Өрөспүүбүлүкэтин Суруйааччыларын уонна РФ Суруналыыстарын сойуустарын чилиэнэ.
Бэйиэт хоһоонноругар мелодистар Аркадий Николаев-Эрхаан, Иннокентий Васильев-Лэгэнтэй, Владимир Индигирскэй, Алексей Калининскай-Луҥха Өлөксөй уо.д.а. ырыа айбыттара[1].
Библиографията
- Кыһыл ойуун таабырына : эссе. — Дьокуускай, 2003. — 60 с.
- Ол түгэн уораана… : сэһэн, кэпсээннэр. — Дьокуускай : Бичик, 2010. — 110 с. : ил.
- Хоһооннорум — айыыларым : бэйэ айымньыта, тылбаас, ханалытыы, интернет кэпсэтии. — Дьокуускай : Ситим, 2012. — 191 с.
- Алмаас уонна хара дьай : сэһэн / Р. Баҕатаайыскай, А. Арчылан. Дьокуускай : Бичик, 2015. — 237 с.
Наҕараадалара
- Саха норуодунай бэйиэтэ И. М. Гоголев-Кындыл аатынан бириэмийэ 2005 сыллааҕы лауреата;
- Саха Өрөспүүбүлүкэтин култууратын туйгуна[2];
- Саха Өрөспүүбүлүкэтин «Гражданскай килбиэн» анал бэлиэтэ.