Васильев Валериан Романович

1938 сыллаахха бэс ыйын 23 күнүгэр Дьокуускайга төрөөбүтэ. Аҕата — Васильев Роман Гаврильевич, бэлиитик, 1953—1956 сс. Саха АССР Совминын бэрэссэдээтэлэ, 1958—1963 сс. Саха АССР Олохтоох бырамыысыланнаһын миниистирэ^[1].

1962 сыллаахха Москубатааҕы үрдүкү уус-уран бырамыысыланнас училищетын бүтэрбитэ. Маһы уус-уран таҥастааһын салаатыгар Б. Н. Лангеҕа уонна В. Е. Егоровка үөрэммитэ.

Үөрэх кыһатын бүтэрэн баран Саха сиригэр төннүбүтэ, Саха уус-уран училищетыгар аҕыйах кэм учууталлаабыта^[2].

Сэттэ эрэ сыл айымньылаахтык үлэлээн, кинигэ графикатыгар, плакакка, дизайнҥа саҥа сүүрээннэри киллэрбитэ. Ордук таһаарыылаахтык графика эйгэтигэр үлэлээбитэ; гравюра, кинигэ ойуулааһынын ускуустубатын төрдүттэн саҥардыбыта^[3].

1964 сылтан - ССРС худуоһунньуктарын Сойууһун чилиэнэ.

1970 сыл ахсынньы ый 4 күнүгэр Дьокуускайга өлбүтэ.

«Кини ахсынньы 4 күнүгэр 1970 сыллаахха соһуччу суох буолбута. Мастарыскыайыттан Ленин проспегынан дьиэтигэр хааман истэҕинэ, кэпсииллэринэн, ханнык эрэ дьон кэнниттэн төбөтүн охсубуттар. Оттон кини оҕо эрдэҕинэ төбөтүн эчэтэ сылдьыбыта, онон тымыра быһа барбыт… Ол курдук биир түгэн биһиги уолбутун, бырааппытын, ыал аҕатын сүтэрбиппит».
Бииргэ төрөөбүтэ Зинаида Васильева кэпсээниттэн^[4]

• Ойуун (1965);
• «Саҥа уонна эргэ» (1965—1966), линогравюралар сиэрийэлэрэ;
• «Саха былыргы уустара» (1967), линогравюралар сиэрийэлэрэ;
• «Кинигэ ааҕа олорон» (1970);
• «Дьулуруйар Ньургун Боотур» (1969), триптих;
• «Колхозники» (1965);
• «Портрет Героя Советского Союза Ф. М. Охлопкова» (1966-67);
• цикл «Думы о времени» 1967;
• «Аал-Луук-Мас» (1967);
• «Кутурҕан», «Сураҕа суох сүппүт», «У огня» литографиялар (1970).
• «Поэт П. А. Ойуунускай» (1970);
• «Моя дочь» (1970).

1999 сыллаахха Саха сирин эдэр худуоһунньуктарыгар Валериан Васильев аатынан тутулуга суох уопсастыбаннай бириэмийэ олохтоммута^[3].