Баттахов Петр Акимович
Баттахов Петр Акимович (1908, Чаппанда нэһилиэгэ — 1968 сыл кулун тутар 22 күнэ) — Аҕа дойду Улуу сэриитин кыттыылааҕа.
Олоҕун олуктара
Петр Баттахов Ньурба Чаппандатыгар 1908 сыллаахха төрөөбүт[1]. Кыһыл Аармыйа кэккэтигэр Ньурба оройуонун военкоматынан ыҥырыллыбыт.
Аҕа дойду сэриитигэр Сталинград хайысхатыгар Калач куорат аттыгар 1942 сыллаахха 64-с аармыйа кэккэтигэр сэриилэспит. Бу кыргыһыыларга сэттэ өстөөҕү өлөрбүтэ биллэр эбит. Балаҕан ыйыгар Куопроснай дэриэбинэ иһин кыргыһыыга бааһырбыт. Бу дэриэбинэ аттыгар Чаппандаттан сылдьар өссө Токусаров Петр Дмитриевич, Тартакынов Петр Федотович уонна Остосов Михаил Кириллович диэн дьон эмиэ бааһырбыттар эбит. Мантан чугас Орловка диэн сир хоту өттүгэр сэриилэспит эмиэ Чаппанда киһитэ Михайлов Николай Тимофеевич кыргыһыы хонуутугар охтубут[2].
Төрөөбүт дойдутугар III бөлөхтөөх инбэлиит буолан төннүбүтэ.
Дьиэ кэргэнэ
Петр Баттахов ийэтэ Марфа уонна аҕата Аким уон оҕолоохторо: Иван-1, Петр, Григорий, Тимофей, Иван-2, Александра, Анастасия, Елена, Марфа, Анна. Тимофей (1918 төр.), Григорий (1916 төр.) уонна Иван (1925 төр.) Аҕа дойду Улуу сэриитигэр өлбүттэрэ.
1947 сыллаахха тыыл бэтэрээнэ Мария Даниловна Николаеваны кытта ыал буолбуттара. Кинилэр аҕыс оҕоломмуттара: Михаил, Петр, Семен, Раиса, Анна, Валентин, Николай, Владимир[3].
Наҕараадалар
- «Хорсунун иһин» мэтээлинэн наҕаараадаламмыт (07.06.1943)[1].