Авелов Александр Михайлович
Александр Михайлович Авелов (2000 сыл атырдьах ыйын 21 күнэ, Ньурба улууһа, Саха сирэ) — арассыыйа көҥүл тустууга, Арассыыйа чөмпүйэнээтин призера. Арассыыйа спордун маастара (2024).
Олоҕун олуктара
2000 сыллаахха атырдьах ыйын 21 күнүгэр Ньурба улууһун Сүлэ нэһилиэгэр төрөөбүтэ[1].
Спортивнай карьерата
2017 сыл от ыйыгар Индияҕа үөрэнээччилэр аан дойдутааҕы оонньууларыгар кыайыылааҕынан буолбута[2].
2019 сыл атырдьах ыйыгар Мииринэйгэ Александр Медведь бирииһигэр Аан дойдутааҕы турнирга кыттыбыта[3]
2022 сыллаахха муус устар 29 күнүгэр Брянскайга Бүтүн арассыыйатааҕы «Локомотив» турнирга боруонса мэтээли ылбыта[4]. Ыам ыйын 17 күнүгэр Москва аттынааҕы Солнечногорскайга Бүтүн арассыыйатааҕы устудьуоннар турнирдарын финалыгар тахсыбыта, онно Тыва бөҕөһүгэр Кежик Седеҥҥа хотторбута[5]. От ыйын ортотугар Грознайга Бүтүн арассыыйатааҕы сайыҥҥы Универсиадаҕа боруонса призер буолбута[6]. Балаҕан ыйын 28 күнүгэр Ханты-Мансийскайга Арассыыйа u23 күрэхтэһиитигэр квалификацияҕа Санкт-Петербургтан Алихан Исаевка хотторбута[7]. Ахсынньыга Нам сэлиэнньэтигэр буолбут Петр Юмшанов бирииһигэр Бүтүн арассыыйатааҕы турнирга финалга дагестанец Саид Хункеровы хотон, кыайыыны ситиспитэ[8].
2023 сыллаахха ыам ыйын 8 күнүгэр Карачаево-Черкесия Преградная станицатыгар, Канамат Боташев кэриэһигэр устудьуоннар ортолоругар Бүтүн арассыыйатааҕы күрэхтэһии финалыгар Дагестантан Магомедамин Бекбулатовка хотторбута[9]. Атырдьах ыйыгар Дьокуускайга университет спордун Аан дойдутааҕы фестивалыгар финалга тиийбитэ, онно кыргыс Бекболот Мырзаназар Уулуга хотторбута[10]. Балаҕан ыйыгар Дьокуускайга Дмитрий Коркин кэриэһигэр Аан дойдутааҕы турнирга кыра финалга Дагестантан Динислам Тахтаровка хотторбута[11]. Алтынньы ортотугар Дьокуускайга Александр Крылов кэриэһигэр Бүтүн Арассыыйатааҕы турнир финалыгар Иркутскай уобаластан бөҕөһүгэр Кежик Монгушка хотторбута[12]. Сэтинньи бүтүүтүгэр Миинскэйгэ, финалга Магомед Себединовы хотон, Александр Медведь бириистэригэр Аан дойдутааҕы турнир кыайыылааҕа буолбута[13].
2024 сыллаахха муус устар 13 күнүгэр Улан-Удэ куоракка «Байкал Опен» Аан дойдутааҕы турнир финалыгар бүрээт Федор Балтуевка хотторбута[14]. Бэс ыйын 4 күнүгэр спорт маастарын аатын ылбыта[15]. Алтынньы ортотугар Дьокуускайга Монголия бөҕөһүн Тувшинтулга Туменбилегы хотон, Дмитрий Коркин кэриэһигэр Аан дойдутааҕы турнирга кыайбыта[16]. 2025 сыллаахха тохсунньу бүтүүтүгэр Дагестантан Имам Умаровы үһүс миэстэ иһин хапсыһыыга хотон, Красноярскайга Иван Ярыгин кубогар боруонса мэтээли ылбыта[17]. Бэс ыйын 28 күнүгэр Москваҕа буолбут арассыыйа чөмпүйэнээтигэр үһүс миэстэ иһин хапсыһыыга Дагестантан Халид Магомедовы кыайбыт, боруонса наҕараада хаһаайына буолбута[18][19].
2025 сыл түмүгүнэн көҥүл тустууга Ньурба улууһун бастыҥ спортсменынан билиниллибитэ[20].
2026 сыл олунньутугар көҥүл тустууга 20-с Аан дойдутааҕы турнирга Ханты-Мансийскай автономнай уокурукка Владимир Семенов кубогар 3-с миэстэни ылбыта[21].
Спортивнай ситиһиилэрэ
- Дмитрий Коркин кэриэһигэр норуоттар ардыларынааҕы турнир —
- Университет спордун аан дойдутааҕы фестивала 2023 —
; - Арассыыйа көҥүл тустууга чөмпүйэнээтэ 2025 —
; - Иван Ярыгин кубога 2025 — ;