Татаринов Владимир Семенович
Татаринов Владимир Семенович (1945 сыл тохсунньу 21 күнэ, Тулагы-Киллэм нэһилиэгэ) — саха сэбиэскэй, Арассыыйа ырыаһыта, ырыа айааччы, мелодист.
Олоҕун олуктара
Владимир Татаринов 1945 сыллаахха тохсунньу 21 күнүгэр Дьокуускай оройуонун Тулагы-Киллэм нэһилиэгэр төрөөбүтэ.
Дьокуускайдааҕы 1 №-дээх педучилище физкультураҕа салаатын бүтэрбитэ.
Бүтүн Сойуустааҕы эстрада ускуустубатын мастерскойугар (Москва к.) үөрэммитэ.
1989 сылтан Саха эстрадатын тыйаатырын артыыһа, «Иэхэй-чуохай» кантри-фольклор бөлөх салайааччыта.
Саха сирин гитаранан ырыа ускуустубатын Москва куоракка комсомол XVII съеһин делегаттарыгар анаммыт «Эстрадная молодежная» диэн театрализованнай концертарга (1974), Дьокуускай куоракка Аан дойдутааҕы «Табык» бэстибээлгэ (1992), Дьокуускай куоракка рок уонна поп-муусука Аан дойдутааҕы бэстибээлигэр (1993), Санкт-Петербурга Саха ыччатын күннэригэр (1994), АХШ-ҕа (Аляска штата) Эйэ пуорумугар (1996) көрдөрбүтэ[1].
Айар үлэтэ
70-тан тахса ырыа ааптара. Онтон ордук биллиилээхтэрэ:
- В. Гольдеров тылларыгар «Умнуллубат онус кылаас»;
- А. Бродников тылларыгар «Саҥа хаар»;
- П. Тарабукин тылларыгар «Харбалаах», «Сахам сирэ»;
- Т. Дүгэ тылларыгар «Любимая Якутия» уонна да атыттар.
«Саҥа хаар» диэн ырыаны Бүтүн Сойуустааҕы «Мелодия» грампластинка устуудьуйатыгар суруйтарбыта.
«Дьоллоох буолуҥ» (1995) аудиоальбома 1000 ахсааннаах тахсыбыта[2].
Наҕараадалара уонна ытык ааттара
- Саха Өрөспүүбүлүкэтин үтүөлээх артыыһа;
- Саха Өрөспүүбүлүкэтин норуодунай артыыһа (2015);
- Нам улууһун ытык киһитэ;
- «Гражданскай килбиэн» бэлиэ;
- Спортивнай ориентированиеҕа ССРС успуордун маастарыгар хандьыдаат.