Сэбиэскэй Сойуус Дьоруойа Ф.К. Попов пааматынньык-бюһа

Аҕа дойду Улуу сэриитэ бүппүтүн кэннэ Саха сирин куораттарыгар, сэлиэнньэлэригэр, ССРС бүтүннүүтүгэр курдук, өлбүт саллааттарга, ордук үрдүк наҕарааданан бэлиэтэммит хорсун быһыылары оҥорбуттар дьоҥҥо анаммытпааматынньыктары, мемориаллары туруорар буолбуттара. Сэбиэскэй Сойуус Дьоруойун аатын ылбыт буойуннар тустарынан өйдөбүл үйэлэргэ хаалыахтаах. Оннук хорсун саллааттартан биирдэстэринэн Саха АССР Мэҥэ-Хаҥалас улууһун олохтооҕо Федор Кузьмич Попов буолар. Майа сэлиэнньэтэ 1930—2007 сс. оройуон киинэ буола сылдьыбытын быһыытынан, онно ордук биир дойдулаахтарын Сэбиэскэй Сойуус Дьоруойа Ф. К. Попов аатын ытыктыыллар. Бу нэһилиэнньэлээх пууҥҥа Федор Кузьмич чиэһигэр хас да өйдөбүнньүк эбийиэк олохтоммут, киин уулусса Герой Попов уулуссата диэн ааттаах. Мемориальнай миэстэлэр ортолоругар 1968 с.сэлиэнньэ киинигэр киэҥ болуоссакка туруоруллубут өйдөбүнньүк бюст ураты суолтаны ылар.

1942 сыллаахха дьокуускайдааҕы «Октябрь» холкуостаахтарын 20 саастаах биригэдьиирэ Федор Кузьмич Попов Кыһыл Аармыйаҕа ыҥырыллыбыта, ол сыл фроҥҥа ыытыллыбыта. 1 октября 1943 сыл алтынньы 1 күнүгэр Днепр өрүһү биир бастакыларынан туораан, ньиэмэс дзотун былдьаабыта. Бу охсуһууга 23 ниэмэс саллаатын уонна офицеры охторор. Уонунан ааҕыллар өстөөхтөр хос атаакаларын төттөрү охсор. Бу сылдьан ыараханнык бааһыра, 1943 сыл алтынньы 13 күнүгэр госпитальга өлбүт. Белоруссия Гомель уобалаһын Лоев оройуонун Дерожичи дэриэбинэтигэр көмүллүбүт.

Сэбиэскэй Сойуус Дьоруойун аата саха дьонуттан бастакы Ф. К. Поповка номнуо өлбүтүн кэннэ, тохсунньу 15 күнүнээҕи ыйааҕынан 1944 сыллаахха иҥэриллибитэ.

Сэбиэскэй Сойуус Дьоруойа Федор Кузьмич Попов пааматынньыгын ааптара — скульптор П. А. Захаров. Майа сэлиэнньэтигэр 1968 сыллаахха туруоруллубута. Чугуун бюст дьоруой мэтириэтигэр майгынныыр. Кыһыл армеец байыаннай таҥастаах, төбөтүгэр пилоткалаах, түөһүгэр «Кыһыл Көмүс Сулус» мэтээллээх. Бюст тирэхтээх үрдүк постамеҥҥа туруоруллубут. Пааматынньык периметрэ 5,2 м, иэнэ 1,687 м².

Саха АССР Миниистирдэрин Сэбиэтин 31.12.1976 сыллааҕы 484 №дээх быһаарыытынан «Саха АССР устуоруйа уонна култуура пааматынньыктарын харыстааһыны тупсарыы туругун уонна дьаһалларын туһунан» пааматынньык култуура нэһилиэстибэтин эбийиэктэригэр киллэриллибитэ уона судаарыстыба харыстабылыгар ылыллыбыта.