Сивцев Степан Петрович

Степан Сивцев 1960 сылллаахха сэтинньи 30 күнүгэр Уус-Алдан Найахытыгар төрөөбүт.

Чурапчы өрөспүүбүлүкэтээҕи спортивнай оскуола-интернатыгар Д. П. Коркин салайыытынан үөрэммитэ. Ону таһынан И. Н. Сивцевкэ эрчиллибитэ. Хабаровскайдааҕы физическэй култуура институтун (билигин Уһук Илиннээҕи физическэй култуура судаарыстыбаннай академията) 1983 сыллаахха бүтэрбитэ.

Степан Сивцев ССРС үрдүк үөрэх университеттарын уонна спортивнай кулууптарын Бүтүн Сойуустааҕы спартакиадатын үрүҥ көмүс призера (1981, Гори), РСФСР чөмпүйэнээттэрин икки төгүллээх үрүҥ көмүс призера (1984, Тула уонна 1985, Орджоникидзе), ССРС−АХШ матчевай көрсүһүүтүн кыайыылааҕа (1987, Ереван). ССРС чөмпүйэнээттэригэр (1984, 1985, 1987) уонна аан дойдутааҕы турнирдарга кыттыбыта.

1984 сылтан 1998 сылга диэри Сивцев Бороҕоннооҕу ДЮСШ-ҕа тренер-преподавателинэн үлэлээбитэ. 1998 сылга Өрөспүүбүлүкэтээҕи орто анал олимпийскай резерв училищетын тренер-преподавателэ этэ. 1999 сылга Саха Өрөспүүбүлүкэтин эдэр уолаттарга көҥүл тустууга сүрүн тренеринэн анаммыта.

Өрөспүүбүлүкэ хамаандатын II, III уонна IV «Азия оҕолоро» Аан дойдутааҕы оонньууларга бэлэмнээбитэ (2000, 2004, 2008). 2005 сылтан 2008 сылга диэри кини өрөспүүбүлүкэ юниорскай сүүмэрдэммит хамаандатын салайбыта, уонна бу сылларга Арассыыйа юниорскай сүүмэрдэммит хамаандатын тренердэрин састаабыгар киирэрэ. 2009 сылтан Степан Сивцев — Саха Өрөспүүбүлүкэтин сүүмэрдэммит хамаандатын сүрүн тренера. Кини салайыытынан Арассыыйа, Европа уонна Аан дойду чөмпүйүөннэрэ уонна призердара бэлэмнэммиттэрэ: Охлопков Егор, Ноговицын Семен, Михайлов Дмитрий, Иванов Антон, Корнилов Иосиф, Олесов Николай, Савинов Платон, Михайлов Осип, Коломиец Евгений, Тимофеев Увар, Алексеев Василий, Прохоров Александр, Иванов Михаил, Лебедев Виктор.

Степан Сивцев хас да наҕараада ылбыта^[1]:

• Найахы нэһилиэгин ытык олохтооҕо^[2];
• Көҥүл тустууга ССРС спордун маастара (1978);
• Саха Өрөспүүбүлүкэтин физическэй култууратын уонна спордун сайдыытыгар үтүөлэрин иһин (1996);
• Саха Өрөспүүбүлүкэтин үтүөлээх тренера (1998);
• Саха Өрөспүүбүлүкэтин Бырабыыталыстыбатын Грамотата (2002);
• Саха Өрөспүүбүлүкэтигэр оҕо спордун сайыннарыыга кылаатын иһин (2004);
• Саха Өрөспүүбүлүкэтин үөрэҕириитин туйгуна (2005);
• Саха Өрөспүүбүлүкэтин Президенин Грамотата (2010);
• Аан дойду уонна Арассыыйа таһымнарыгар үрдүк ситиһиилээх спортсменнары эрчийибитин, бэлэмнээбитин иһин Степан Петрович Сивцев 2010 с. Д. П. Коркин аатынан физическэй култуураҕа уонна спорка Судаарыстыбаннай бириэмийэ лауреаата буолбута (2010)^[3];
• Арассыыйа үтүөлээх тренера (2013);
• Саха Өрөспүүбүлүкэтин «Гражданскай килбиэн» бэлиэтэ.