Прокопьев Анисим Григорьевич

1925 сыллаахха балаҕан ыйын 7 күнүгэр Үөһээ Бүлүү улууһугар I Күүлэт нэһилиэгэр төрөөбүт. Анисим Григорьевич Егор Крылатовтыын «Хотун Бүлүү» монумент ааптардара буолаллар.

Сэрии кэмигэр Забайкальскай фроҥҥа Монголияҕа снайпердар оскуолаларыгар отделение хамандыырынан сулууспалаабыт. Снайпердары үөрэппитин иһин «Отличник РККА по боевой и политической подготовке» бэлиэнэн наҕараадаламмыт. Японияны утары сэриигэ бааһыра сылдьыбыт.

1950-54 сыллардаахха Дьокуускайдааҕы фельдшерскай оскуолаҕа үөрэммитэ.

Биэлсэр идэтин ылан баран, Доруобуйа харыстабылын министиэристибэтин ыйыытынан төрөөбүт Үөһээ Бүлүүтүгэр анаммыта. Онно Мэйик нэһилиэгэр саҥа аһыллар ФАП-ка биэлсэринэн ананан 1954—1957 сылларга үлэлээбитэ.

1954—1957 сылларга Хоротооҕу ФАП-ка сэбиэдиссэйинэн үлэлээбитэ уонна онно уон куойкалаах тыа сирин ФАП-ын туттарыыны ситиспитэ. 1960 сылга тиис техниктар куурустарыгар ыытыллыбыта. Кууруһун бүтэрэн баран Үөһээ Бүлүүтээҕи оройуон балыыһатыгар протезиһынан ананан, 1973 сылга диэри үлэлээбитэ.

1973 сылтан 1981 сылга диэри Үөһээ Бүлүүдээҕи райисполком култуураҕа отделын сэбиэдиссэйинэн үлэлээбитэ.

1982 сылтан бэйэтин көҕүлээһининэн, уопсастыбаннай төрүтүнэн Үөһээ Бүлүүгэ «Өрөбөлүүссүйэ, кыргыһыы уонна үлэ албан аатын» түмэлин тэрийбитэ.

Анисим Прокопьев 2017 сыллаахха кулун тутар 26 күнүгэр өлбүтэ^[1].

Кэргэнэ — Давыдова Е. Ф., учуутал. Алта оҕоломмуттара^[1].

• Аҕа дойду сэриитин II ст. уордьана;
• «Хорсунун иһин» мэтээл;
• «Бойобуой өҥөлөрүн иһин» мэтээл (28.08.1945)^[2];
• «Японияны кыайыы иһин» мэтээл;
• ССРС Доруобуйатын харыстабылын туйгуна;
• Саха АССР култууратын үтүөлээх үлэһитэ;
• Үөһээ Бүлүү улууһун ытык киһитэ.