Пестряков Иннокентий Юрьевич

Иннокентий Пестряков 1962 сыллаахха от ыйын 19 күнүгэр Нам оройуонун Хатырык с. төрөөбүт. Аҕата Юрий Петрович колхуостаах, ийэтэ Мария Степановна балыыһа үлэһитэ. Иннокентий ыал улахан уола этэ. Былыргыны сэргииригэр улахан сабыдыалы эбэтэ Харитина Кононовна Старостина оҥорбут буолуохтаах диэн сабаҕалыыллар. 1977 сыллаахха Нам музыкальнай оскуолатын художественнай кылааһын бүтэрбитэ^[1].

1981 сыллаахха Граф биэрэгинээҕи профтехучилищены бүтэрбит. 1982—1984 сылларга аармыйаҕа сулууспалаабыта (бу сылдьан дьонугар хоһоонунан сурук суруйар дьээбэлээх эбит)^[2]).

Хабаровскайдааҕы култуура уонна ускуустуба институтугар, ол кэннэ Хабаровскайдааҕы физкультура институтугар үөрэммит.

Уссурийскай заповедникка егердии, Сахалииҥҥа балык собуотугар үлэлии сылдьыбыт кэмнэрдээх этэ. Биробиджааннааҕы драма тыйаатырыгар сценограбынан уонна режиссерунан үлэлээбитэ. Шолом Алейхем «Фрейлехс» уонна Исаак Бабель «Одесские истории» испэктээктэрин иһин Арассыыйа тыйаатырдарын бэстибээлин лауреата буолбута.

Дойдутугар төннөн кэлэн баран уруһуй учуутала, култуура дьиэтин дириэктэрэ, Нам оройуоннааҕы култууратын салаатын мэтэдииһэ, Саха тыйаатырыгар бутафор буола сылдьыбыта.

1994 сылга Дьокуускайга көһөр. «Эдэр саас», «Саха сирэ», «Киин куорат» хаһыаттарга уонна «Чуораанчык» диэн оҕоҕо аналлаах сурунаалга худуоһунньук-иллюстратордаабыта. Саха сирин устуоруйатыгар анаан оҥорбут «Маһары Бозеков нуучча ыраахтааҕытыгар», «Лөгөй нуучча хаһаахтарын көрсүүтэ», «XX үйэ саҕаланыытынааҕы Дьокуускай. Троицкай собуор», «Эргэ куоратынан дьаарбайыы» сиэрийэтэ хрестоматия суолтатын ыллылар^[3].

1999—2004 сс. — Арктическай судаарыстыбаннай култуура уонна ускуустуба институтугар үөрэммит.

РФ суруналыыстарын чилиэнэ.

Кэргэнэ — Варвара. Пестряков «Балбаара» диэн хартыынатыгар кини кэргэнэ ойууланар^[1].

• Борис Васильев аатынан суруналыыстар бириэмийэлэрин лауреата (1997);
• Саха Өрөспүүбүлүкэтин бастакы бэрэсидьиэнэ М. Е. Николаев бириэмийэтин стипендиата (2000);
• «Илин» сурунаал лауреата (2002)^[1].