Никифоров Семен Осипович

1923 сыллаахха атырдьах ыйын 27 күнүгэр Мэҥэ-Хаҥалас улууһун Иккис Тыыллыма нэһилиэгэр төрөөбүтэ.

1942 сыллаахха Дьокуускайдааҕы култуурунай-сырдатар оскуоланы бүтэрбитэ уонна Өлүөхүмэҕэ Кыһыл чуум сэбиэдиссэйинэн үлэлээбитэ.

1943 сыл бэс ыйыгар Өлүөхүмэ улууһун байыаннай хамыһарыйаатынан Аармыйаҕа ыҥырыллыбыта. 1944 сыл муус устарыттан сэрии бүтүөр диэри фронт инники кирбиитигэр Берлиҥҥэ тиийэ сэриилэспитэ. Гвардия старшай сержана.

Дойдутугар 1947 сыллаахха эргиллибитэ.

Оройуон хаһыатын эрэдээктэринэн, ЫБСЛКС райкомун бастакы сэкирэтээринэн, ССКП райкомун салаатын сэбиэдиссэйинэн үлэлээбитэ.

Дьокуускайга уобаластааҕы баартыйа оскуолатын бүтэрбитэ.

«Хотугу сулус» сурунаал эрэдээксийэтигэр, о. д. а. тэрилтэлэргэ үлэлээбитэ.

1950 сылтан ССКП чилиэнэ.

1965 сылтан ССРС Суруйааччыларын сойууһун чилиэнэ.

1961 сыллаахха кэпсээннэрин бастакы хомуурунньуга бэчээттэммитэ.

1969 сыллаахха кэпсээннэрин, сэһэннэрин түмэн «Дойдум дьоно» кинигэтин таһааттарбыта. «Туркулаах кистэлэҥнэрэ» сэһэни суруйбута.

Сэбиэскэй саллааттар сэрии уоттаах толоонугар бойобуой, хорсун быһыыларын «Саллаат дьылҕата» кинигэтигэр суруйбута.

Суруйааччы айымньыларын дьоруойдарынан Хоту дойду тулуурдаах дьоно, тыа хаһаайыстыбатын туруу үлэһиттэрэ, учууталлар, суруналыыстар, хорсун-хоодуот саллааттар, эйэлээх олоҕу тутааччылар буолаллар.

• Албан аат III ист. уордьана (28.06.1945)^[1];
• «1941-1945 сс. Аҕа дойду Улуу сэриитигэр Германияны кыайыы иһин»,
• «Берлини ылыы иһин»;
• Саха АССӨ култууратын үтүөлээх үлэһитэ.

• Соргучаан үрэҕэр. — Дь., 1965;
• Дойдум дьоно. — Дь., 1969;
• Туркулаах кистэлэҥнэрэ. — Дь., 1971;
• Олох суолугар. — Дь., 1973;
• Өлөрү кыайбыттар. — Дь., 1975;
• Саллаат доҕотторум. — Дь., 1980;
• Саллаат дьылҕата. — Дь., 1983;
• Ытык хайа ыаллара. — Дь., 1988.