Нуучча тылынанАнал бырайыактар
Тылы уларыт
УРУБИИКИ ТУҺУНАН

Нельбисова Галина Васильевна

Галина Васильевна Нельбисова (1961 сыл ыам ыйын 15 күнэ, Кутана, Саха АССР) — Арассыыйа суруйааччыта, суруналыыс, Арассыыйа Суруналыыстарын уонна Суруйааччыларын сойуустарын чилиэнэ (2008), Саха Өрөспүүбүлүкэтин култууратын үтүөлээх үлэһитэ (2011), Сунтаар улууһун Элгээйи сэлиэнньэтин Ытык олохтооҕо (2015)[1].

Олоҕун олуктара

1961 сыллаахха ыам ыйын 15 күнүгэр Сунтаар улууһун Кутана сэлиэнньэтигэр төрөөбүтэ. Элгээйи орто оскуолатыгар үөрэммитэ.

1979 сыллаахха Саха судаарыстыбаннай университетыгар үөрэнэ киирбитэ, 1982 сыллаахха үһүс куурустан Ураллааҕы судаарыстыбаннай университет суруналыыстыка факультетыгар көһөртөрөн, 1985 сыллаахха бүтэрбитэ. 1984 сыллаахха идэтинэн үлэтин «Эдэр коммунист» хаһыакка комсомольскай олох салаатын кэрэспэдьиэтинэн, үөрэнэр ыччат салаатын сэбиэдиссэйинэн саҕалаабыта.

«Саха Сирэ» хаһыат салаатын эрэдээктэринэн, өрөспүүбүлүкэ бэчээтин эйгэтигэр 20-тэн тахса сыл үлэлээбитэ. Билигин — «Далбар Хотун» өрөспүүбүлүкэтээҕи дьахталлар сурунаалларын сүрүн эрэдээктэрин солбуйааччыта.

Саха Өрөспүүбүлүкэтин дьахталларын тэрилтэлэрин түмсүүтүн президиумун чилиэнэ, Саха Өрөспүүбүлүкэтин норуот педагогикатыгар ассоциациятын бырабылыанньатын чилиэнэ[1][2].

Айар үлэтэ

«Санаам хаппахчытын сэгэтэн…» (2000) диэн бастакы кинигэтэ Арассыыйа «Крепка семья — крепка держава» күрэһин дипломунан наҕараадаламмыта. 15-тэн тахса кинигэ ааптара.

Сэһэннэрэ уонна кэпсээннэрэ «Таптал таабырына» уонна «Билиҥҥи кэм прозата» диэн сиэрийэлэргэ түмүллүбүттэр. Дьиэ кэргэн, ийэ, дьахтар проблемаларыгар идэтийэн суруйар, нэһилиэнньэ социальнай көмүскэлин, үлэ боппуруостарыгар утумнаахтык суруйар. Кинигэлэрэ «Бичик» (билигин «Айар») национальнай кинигэ кыһатыгар бэчээттэммиттэрэ. Айымньылара нууччалыы тылбаастаммыттара[1][2].

Наҕараадалара уонна ытык ааттара

  • Арассыыйа Суруналыыстарын уонна Суруйааччыларын сойуустарын чилиэнэ (2008);
  • Саха Өрөспүүбүлүкэтин култууратын үтүөлээх үлэһитэ (2011);
  • Саха Өрөспүүбүлүкэтин култууратын туйгуна (2001);
  • Саха Өрөспүүбүлүкэтин бэчээтин туйгуна (2005);
  • Саха Өрөспүүбүлүкэтин социальнай сулууспатын туйгуна (2011);
  • «Бичик» НКИ уонна СӨ Бэрэсидьиэнин иһинэн Тыл бэлиитикэтин сэбиэтин «Элбэх ааҕааччылаах суруйааччы» номинациятын лауреата (2010);
  • Сунтаар улууһун Элгээйи сэлиэнньэтин Ытык олохтооҕо (2015);
  • Саха Өрөспүүбүлүкэтин суруналыыстарын сойууһун «Көмүс бөрүө» бириэмийэтин «Көдьүүстээх суруйуу иһин» номинациятын лауреата[1].

Дьиэ кэргэнэ

Марина Ивановна уонна Василий Павлович Нельбисовтар дьиэ кэргэннэригэр иитиллибитэ. Төрөппүттэрэ — Марфа Ивановна уонна Парфений (биологическай ийэтэ уонна аҕата). Бырааттаах уонна балтылаах[3]. Кэргэннээх, оҕолордоох[2].

Айымньылара

  • Санаам хаппахчытын сэгэтэн… — Дьокуускай: СР үөрэҕин м-вотын кыра уонна орто анал үөррэхтээһин Департаменын изд-та, 2000. — 80 с.
  • Мин таайылла илик таабырыммын… — Дьокуускай: Бичик, 2003. — 80 с.
  • Кытылга кыыс ытыыра… Кэпсээннэр. — Дьокуускай: Бичик, 2005. — 96 с.
  • Күннэй кистэлэҥэ. Сэһэн. — Дьокуускай: Бичик, 2006. — 112 с.
  • Түүл буолан сүтүмэ. Сэһэн. — Дьокуускай: Бичик, 2008. — 208 с.
  • Син биир күүтэр эбиппин… Сэһэн. — Дьокуускай: Бичик, 2011. — 176 с.
  • Эн уонна мин. Эн кэргэниҥ… Сэһэн. — Дьокуускай: Бичик, 2012. — 189 с.
  • Сунтаар кыргыттара — ырыа түһүлгэтигэр. — Дьокуускай: Сайдам, 2013. — 64 с.
  • Оһуордаах сыттыкпар эн суоххун… Дьиҥнээх олохтон кэпсээн. — Дьокуускай: Сайдам, 2015. — 63 с.
  • Эн миэхэ соҕотоххун… Сэһэн. — Дьокуускай: Бичик, 2015. — 128 с.
  • Айылҕаттан айдарыылаах Чугдаара Хотун. — Дьокуускай: Бичик, 2016. — 101 с.
  • Арыгыһыт кэргэннээх — сор. Сэһэн, кэпсээннэр. — Дьокуускай: Бичик, 2018. — 63 с.
  • Чуумпу кытылым нуһараҥар. Бэлиэтээһиннэр, интервьюлар, кэпсээннэр. — Дьокуускай: Сайдам, 2021. — 184 с.
  • Чып кистэлэҥинэн… Сэһэн, кэпсээннэр. — Дьокуускай: Айар, 2024. — 288 с.

Быһаарыылар

  1. ↑ 1 2 3 4 Нельбисова Галина Васильевна (рус.). Сунтарская библиотека. Сигэнии күнэ: 22 От ыйын 2026.
  2. ↑ 1 2 3 Хаһыатчыт Далбар хотун — Галина Нельбисова (рус.). Эдэр саас (20 Ыам ыйын 2021). Сигэнии күнэ: 22 От ыйын 2026.
  3. ↑ Зелёный бидон (рус.). Полярная звезда (29 Тохсунньу 2025). Сигэнии күнэ: 22 От ыйын 2026.

Категориялар