Нуучча тылынанАнал бырайыактар
Тылы уларыт
УРУБИИКИ ТУҺУНАН

Егоров Игорь Владимирович

Егоров Игорь Владимирович (Игорь Егоров; 1980 сыл олунньу 2 күнэ, Ньурба улууһа, Саха АССР) — ырыаһыт, спортсмен, стендовай ытыыга (компакт-спортинг көрүҥҥэ) спорт маастара. Саха Өрөспүүбүлүкэтин култууратын үтүөлээх үлэһитэ (2024).

Олоҕун олуктара

1980 сыллаахха олунньу 2 күнүгэр Ньурба улууһугар (бигэргэммэтэх дааннайдарынан, Ньурба куоракка) урбаанньыттар дьиэ кэргэннэригэр төрөөбүт.

Убайаан орто оскуолатыгар үөрэммит (билигин Ньурба куоракка киирсэр). Үрдүкү кылаастарга оскуола диджейэ уонна оскуола бэрисидьиэнэ эбит[1].

Оскуолатын сылларыгар тустуунан, волейболунан үлүһүйэр, булка-алка сыстыгас эбит[2].

Уопсай үөрэхтээһин оскуолатын кытта сэргэ, сэттэ сыл устата Ньурбатааҕы музыка оскуолатыгар үөрэммит. Ол сылларга «Хотугу сулус» өрөспүүбүүлүкэтээҕи ырыа күрэҕин лауреата буолбут.

1997 сыллаахха оскуоланы бүтэрбит уонна тута икки үөрэх кыһатыгар киирбит — Эргиэн-экэниэмикэ колледжыгар уонна Дьокуускайдааҕы музыка училищетыгар (фортепиано салаатыгар). Иккиэннэрин 2001 сыллаахха бүтэрбит. Училищеҕа түмүктүүр экзамеҥҥа Шопен (нууч.) (сах. уустук «Этюдын» толорбут[1].

Саха эстрадатын ырыаһытын быһыытынан 2000 сыллаахтан биллэр. Ону сэргэ, бэйэтин категориятыгар компакт‑спортиҥҥа Россия биир күүстээх ытааччыта буолар. Бу икки эйгэҕэ тэҥинэн ситиһиилээҕэ кини уратыта буолар.

Айар үлэтэ

«Тыа уолчаана» дебютнай альбома магнитнай кассетаҕа 2000 сыллаахха, өссө студент эрдэҕинэ, тахсыбыт. Бу бастакы хомуурунньугар ырыа айааччы Владимир Васильев ырыалара киирбиттэр: «Тыа уолчаана», «Ньурба кыыһа», «Нөрүө нөргүй», «Нарыйаана», «Төрөөбүт күҥҥүнэн» (Элтон Джон ырыатын дьүрүлүгэр)[3].

2003 сыллаахха эдэр ырыаһыт идэтийбит уопсастыба дьоһуннаах билиниитин ылан, «Этигэн хомус» муусука бириэмийэтин «2003 сыл бастыҥ ырыаһыта» номинация хаһаайына буолбут[1].

Бэйэтин ырыаларыттан ураты, дуэтынан ыллаабыт ырыалардаах: Варя Максималыын «Сырдык санаа» уонна Уля Сергучева — Күннэйдиин «Саҥа дьыл», Олимпиялыын «Сулуһум», «Доҕоруом».

Маны таһынан, репертуарыгар Никииппэр Сэмэнэп «Күннэтэ күүтэбин» уонна Айыы Уола «Сордооморууй-аймаамарыый» ырыалара бааллар[2].

«Хаартыскалар», «Ньурба туһунан ырыа» уонна «Билбэтэҕим» ырыалара дьоҥҥо киэҥник биллэллэр. «Билбэтэҕим» ырыаҕа 2010 сыллаахха клип уһуллан тахсыбыт.

2011 сыллаахха «Этигэн хомус» муусука бириэмийэтин «Сыл бастыҥ ырыаһыта» лауреата буолбут[4].

2012 сыллаахха Опера уонна балет судаарыстыбыннай тыйаатырын дьиэтигэр бастакы айар киэһэтэ буолан ааспыт[5].

2020‑с сылларга Олимпияны уонна Петр Кулаковскайы кытта ыкса үлэлэһэр. Өрөспүүбүлүкэ улуустарынан сылдьан «Көрсүһэр түгэн» диэн кэнсиэри тэрийэллэр[6].

2024 сыллаахха «Ассоциация артистов РС (Я)» Автономнай кэмиэрчэскэйэ суох тэрилтэни арыйбыт уонна дириэктэрэ буолбут.

2000-2020‑с сыллардааҕы саха эстрадатын биллэр-көстөр толорооччулартан биирдэстэрэ.

Спортка карьерата

Стендовай ытыынан 2004 сыллаахтан дьарыктанан, спорт маастарын аатын ситиспит. «Компакт-спортинг» диэн дисциплинаҕа Саха сирин биир бастыҥ ытааччыта буолар.

Билигин Арассыыйа күүстээх ытааччыларын иһигэр киирэр, кэнники сылларга аан дойдутааҕы таһымнаах күрэхтэргэ кыттан саҕалаабыт[2].

Ситиһиилэрэ

  • 2020 сыл: компакт-спортиҥҥа Арассыыйа Кубогын VI түһүмэҕэр «А» категорияҕа ситиһиилээхтик кыттыбыт (188 очко)[7];
  • 2022 сыл: Волгоградка компакт-спортиҥҥа Арассыыйа Кубогын XII түһүмэҕэр үһүс миэстэ буолбут[8];
  • 2023 сыл (атырдьах ыйын 19-21 күннэрэ): Барнаулга компакт-спортиҥҥа Арассыыйа Кубогын IX түһүмэҕин кыайыылааҕа. «А» категорияҕа 200-тэн 196 сыалы охсон бастакы миэстэни ылбыт[9];
  • 2024 сыл: компакт-спортиҥҥа Саха сирин Чемпионатын Муҥутуур кыайыылааҕа[10];
  • 2025 сыл (олунньу): «Тольятти Улахан бирииһэ-2025» Арассыыйа Кубогын кыайыылааҕа. «А» категорияҕа 200-тэн 195 сыалы таппыт, 260-тан тахса кыттааччыны тумнубут[11];
  • 2025 сыл: Саха сирин норуоттар икки ардыларынааҕы түһүлгэҕэ билиһиннэрэн, спортиҥҥа уонна компакт-спортиҥҥа Африка Чөмпүйэнээтигэр кыттыбыт[10].

Тус олоҕо

Бастакы официаллык холбоспотох кэргэниттэн кыыс оҕолоох[2].

2018 сыллаахха «Евразия-Sakha 2014» күрэх «Көрөөччүлэр биһирэбиллэрэ» бириис кыайыылааҕа Ирина Загурнаяны кытта ыал буолбуттар[12]. Уол оҕолоохтор.

Наҕараадалара уонна ытык ааттара

  • Саха Өрөспүүбүлүкэтин култууратын туйгуна (балаҕан ыйа 2021) — култуураҕа улахан кылаатын иһин Дьокуускай куорат күнүгэр аналлаах кэнсиэргэ туттарыллыбыт[13];
  • Саха Өрөспүүбүлүкэтин култууратын үтүөлээх үлэһитэ (2024) — уһулуччулаах өҥөлөрүн иһин Ньурба улууһун Ыһыаҕар туттарыллыбыт[14];
  • Арассыыйа спордун маастара.

Быһаарыылар

  1. ↑ 1 2 3 Игорь Егоров. 7 тем для звезды (рус.). Журфикс (23 Олунньу 2026).
  2. ↑ 1 2 3 4 Тыа уолчаана Игорь Егоров/ (рус.). Эдэр Саас (23 Олунньу 2026).
  3. ↑ Игорь Егоров MP3 скачать бесплатно, новинки музыки Игорь Егоров - 36 песен/песни онлайн (рус.). Музофонд. Сигэнии күнэ: 23 Олунньу 2026.
  4. ↑ Владимир Индигирский: Благодарные звезды эстрады на концерте «Этигэн хомус» (рус.). Сигэнии күнэ: 8 Кулун тутар 2026.
  5. ↑ Концерт Игоря Егорова посетила президентская чета (рус.). Сигэнии күнэ: 8 Кулун тутар 2026.
  6. ↑ Концерт «Миг встречи» (рус.). Сигэнии күнэ: 8 Кулун тутар 2026.
  7. ↑ Игорь Егоров из Якутии стал победителем этапа Кубка России по компакту (рус.) (23 Олунньу 2026).
  8. ↑ В Волгограде завершился 12 этап Кубка России по спортинг-компакту.(биллибэт). sporting.ru. Сигэнии күнэ: 23 Олунньу 2026.
  9. ↑ Певец Игорь Егоров победил на девятом этапе Кубка России по спортинг-компакту (рус.) (23 Олунньу 2026).
  10. ↑ 1 2 Талант без границ: Музыкант и чемпион Игорь Егоров (рус.) (23 Олунньу 2026).
  11. ↑ https://sakhalife.ru/news/zvezda-estrady-bezuslovnyj-korol-sportinga/. sakhalife.ru. Сигэнии күнэ: 23 Олунньу 2026.
  12. ↑ Красавчик Игорь Егоров женился! (рус.). sakhatime.ru. Сигэнии күнэ: 23 Олунньу 2026.
  13. ↑ Олимпия и Игорь Егоров стали "Отличниками культуры Якутии" (рус.) (23 Олунньу 2026).
  14. ↑ Татьяна Бурцева. - Певцу Игорю Егорову на нюрбинском Ысыахе вручили высокую награду. web.archive.org. Сигэнии күнэ: 23 Олунньу 2026.

Эбии бу тиэмэҕэ

Категориялар