Булатов Виктор Николаевич
Булатов Виктор Николаевич (XIX үйэ, Иркутскай — XX үйэ) — Саха уобалаһыгар 1903—1906 сс. губернаторынан үлэлээбитэ.
Олоҕун олуктара
Иркутскай куоракка дворянин дьиэ кэргэнигэр төрөөбүтэ. Күбүөрүнэтээҕи гимназияны бүтэрбитэ.
1879 сыл сэтинньи-ахсынньы ыйдарыгар Сахалин арыытыгар сырыы суолун тэрийии уонна колонизация боппуруостарыгар этиилэри оҥорор хамыыһыйа састаабыгар үлэлээбитэ.
1881 сыллаахха Булатов Забайкалье, Амуур уонна Приморье уобаластарын кэрийэ сылдьан көрүү-истии кэмигэр генерал-губернатор суоллааҕы канцеляриятын салайбыта.
1881 сыл кулун тутар 16 күнүгэр Булатов туйгуннук сулууспалаабытын иһин надворнай сүбэһит чыынын ылбыта.
1885 сыл ыам ыйыгар коллежскай сүбэһит чыынын ылбыта.
1901—1903 сс. Иркутскай уобалаһыгар вице-губернатордаабыта.
1903 сылтан 1906 сылга диэри Дьокуускай губернаторынан үлэлээбитэ. Дьокуускайга «Романовка сэбилэниилээх бырачыаһын» хам баттаабыта, «Сахалар сойуустарын» кыттыылаахтарын дьүүллэппитэ.
1906 сыл алтынньытыгар сулуусбаттан уурайбыта[1].
Наҕараадалара
- Икки төгүл I уонна II истиэпэннээх Станислав уордьанынан наҕараадаламмыта;
- Сибэтиэй Анна I уонна II истиэпэннээх уордьана;
- Сибэтиэй Владимир III уонна IV истиэпэннээх уордьана.
Дьиэ кэргэнэ
- Кэргэнэ — Артемия Илиньична. Дьиэ кэргэн үс оҕолооҕо: Ольга, Вера, Надежда.