Нуучча тылынанАнал бырайыактар
Тылы уларыт
УРУБИИКИ ТУҺУНАН

Бахвалов Николай Михайлович

Николай Михайлович Бахвалов (1947 сыл алтынньы 7 күнэ — 2013 сыл от ыйын 9 күнэ, Дьокуускай) — сэбиэскэй уонна Арассыыйа опернай ырыаһыта, драматическай тенор, Д. К. Сивцев — Суорун Омоллоон аатынан Саха Өрөспүүбүлүкэтин Судаарыстыбаннай опера уонна балет тыйаатырын артыыһа. Саха Өрөспүүбүлүкэтин үтүөлээх артыыһа (1999).

Олоҕун олуктара

Николай Бахвалов 1981 сыллаахха Л. В. Собинов аатынан Саратовтааҕы консерваторияны бүтэрбитэ. Ырыаһыт опернай дебюта 1982 сыллаахха Омскайдааҕы муусука тыйаатырыгар Альфред партиятыттан («Травиата», Дж. Верди) саҕаламмыта. Кини Новосибирскайдааҕы опера уонна балет тыйаатырыгар, М. И. Глинка аатынан Челябинскайдааҕы опера уонна балет тыйаатырыгар, Нижнэй Новгородтааҕы опера уонна балет тыйаатырыгар, Башкирскай опера уонна балет тыйаатырыгар сыанаҕа тахсыбыта. 1992 сылтан олоҕун тиһэх күннэригэр диэри Бахвалов Саха Өрөспүүбүлүкэтин оператын тыйаатырыгар опернай солиһынан үлэлээбитэ, Дьокуускайдааҕы муусука кэллиэһигэр устудьуоннарга италия тылын үөрэппитэ (1994 сылтан), таҥара дьиэтин хоругар ыллаабыта (1996 сылтан)[1].

Ырыаһыт репертуарыгар тенор куоласка анаммыт 20-чэ сүрүн партия баара, ол иһигэр Герман («Пиковая дама», П. И. Чайковскай), Герцог уонна Манрико («Риголетто» уонна «Трубадур», Дж. Верди), Самозванец уонна Шуйскай («Борис Годунов», М. П. Мусоргскай)[2], Калаф («Турандот», Дж. Пуччини). Бахвалов А. Борисов туруоруутугар «Борис Годунов» испэктээккэ биир бириэмэҕэ икки партияны Самозванеһы уонна Шуйскайы аан бастакынан толорбута[1].

Ырыаһыт айар үлэтин биир чаҕылхай түгэнинэн 2007 сыллаахха Москубаҕа В. Кобекин «Александр Македонский» диэн оператын аан дойдутааҕы премьератыгар кыттыыта (Сэрии баһылыга) буолбута. 2009 сыллаахха Н. Бахвалов кыттыылаах бу испэктээк «Көмүс мааска (нууч.) (сах.» бэстибээл дьүүллүүр сүбэтин анал бирииһин ылбыта.

Тыйаатырын кытта Казань, Нерюнгри куораттарга гастролларга сылдьыбыта.

Дьокуускай куоракка буолан ааспыт Бүтүн Арассыыйатааҕы уонна норуоттар икки ардыларынааҕы опера юэстибээллэрин кыттыылааҕа: Музыка П. Чайковского (1992), Музыка Дж. Верди (1995), Оперно-балетный и Юбилейный фестиваль (2001), «Ария Севера» (2003), «Ирина Архипова и Владислав Пьявко представляют…» (2004)[3].

Наҕараадалара

  • Саха оператын сайдыытыгар киллэрбит үтүөлэрин иһин 1999 сыллаахха Н. М. Бахваловка «Саха Өрөспүүбүлүкэтин үтүөлээх артыыһа» диэн бочуоттаах аат иҥэриллибитэ.
  • 2002 сыллаахха ырыаһыт «Саха сирэ Арассыыйаны кытта 370 сыла» диэн ураты бэлиэнэн наҕараадаламмыта.

Быһаарыылар

  1. ↑ 1 2 Министерство культуры и духовного развития РС(Я) выражает соболезнования в связи с уходом из жизни заслуженного артиста Республики Саха (Якутия) Николая Бахвалова. Якутское-Саха Информационное Агентство (10 От ыйын 2013). Сигэнии күнэ: 4 Тохсунньу 2025.
  2. ↑ Бахвалов Николай Михайлович. База данных «Актёры России». Сигэнии күнэ: 4 Тохсунньу 2025.
  3. ↑ Ушел из жизни солист оперы ГТОиБ им. Суоруна Омоллоона Бахвалов Николай. Сигэнии күнэ: 30 От ыйын 2026.

Категориялар