Афанасьева Лена Николаевна
Лена Николаевна Афанасьева (төр. 1968 сыл сэтинньи 30 күнэ, Дьокуускай) — Арассыыйа судаарыстыбаннай диэйэтэлэ, быраас. Доруобуйа харыстабылын миниистирэ (2021 сылтан). Мэдэссиинэ билимин хандьыдаата.
Олоҕун олуктара
Лена Афанасьева 1968 сыллаахха сэтинньи 30 күнүгэр Дьокуускай куоракка төрөөбүт[1][2].
Үөрэҕэ
1992 сыллаахха Саха судаарыстыбаннай университетын «Эмтиир дьыала» идэтин бүтэрбитэ. 1993 сыллаахха Мирнэй куорат медсанчаһыгар интернатураны, 1996 сыллаахха Арассыыйа Доруобуйа харыстабылын министиэристибэтин «Арассыыйатааҕы мэдэссиинэ салгыы идэни үрдэтии академиятыгар» клиническай ординатураны бүтэрбитэ. 2004 сыллаахха РАМН Н. Н. Блохин аатынан Арассыыйатааҕы онкологическай билим киинин базатыгар хандьыдаат диссертациятын көмүскээбитэ.
Үлэтэ
1992—1993 сылларга «Якуталмаз» ПНО Головной мэдэссиинэ-санитария чааһыгар интернатураны ааспыта.
1993—1994 сылларга Саха өрөспүүбүлүкэтээҕи онкологическай диспансерга быраас-онколог-гинекологынан үлэлээбитэ.
1996—2000 сылларга Саха өрөспүүбүлүкэтээҕи онкологическай диспансер гинекология салаатыгар быраас-акушер-онкогинеколог, хирург дуоһунаһыгар үлэлээбитэ.
2000—2009 сылларга Саха өрөспүүбүлүкэтээҕи онкологическай диспансер гинекология салаатын салайбыта.
2009 сылга «Дьокуускай куорат 5 №-дээх балыыһата» МУ кылаабынай бырааһын тэрийэр-методическай уонна мобилизационнай үлэҕэ солбуйааччытынан үлэлээбитэ.
2009—2011 сылларга «Дьокуускай куорат доруобуйа харыстабылын салаатын» тэрийэр-методическай үлэҕэ начальнигын солбуйааччыта.
2012—2013 сылларга Саха Өрөспүүбүлүкэтин Доруобуйа харыстабылын министиэристибэтин иһинэн үлэлиир тэрилтэ салайааччытын солбуйааччыта.
2013—2017 сылларга Саха Өрөспүүбүлүкэтин Доруобуйа харыстабылын министиэристибэтин иһинэн «Дьокуускай куорат доруобуйа харыстабылын салайыытын» салайааччыта[1].
2017 сылтан 2021 сылга диэри Саха өрөспүүбүлүкэтээҕи онкологическай диспансер кылаабынай бырааһынан үлэлээбитэ.
2020 сылтан 2021 сылга диэри Дьокуускай куорат дууматын дьокутаата.
2021 сыл ахсынньытыттан доруобуйа харыстабылын миниистирэ[3].
Билим үлэтэ
Лена Афанасьева 30-тан тахса билим ыстатыйа ааптара, идэтинэн икки методическай рекомендацияны оҥорбута[4].
Уопсастыбаннай үлэтэ
«Саха Өрөспүүбүлүкэтин онкологтарын ассоциацията», «Арассыыйа ийэлэрэ» диэн бүтүн Арассыыйатааҕы уопсастыбаннай тэрилтэ Дьокуускайдааҕы эрэгийиэннээҕи салаатын, «Доруобуйа харыстабылын тэрийии уонна уопсастыбаннай доруобуйа уопсастыбатын» эрэгийиэннээҕи салаатын, ону кытта «Саха сирин дьахтар-учуонайдара» Лига чилиэнэ буолар.
2020 сыллаахха 7 №-дээх Автодорожнай быыбардыыр уокуругтан Дьокуускай куорат Дууматын дьокутаатынан талыллыбыта.
Биир ньыгыл Арассыыйа чилиэнэ[1].
Дьиэ кэргэнэ
Кэргэннээх, икки оҕолоох[4].
Наҕараадалара
Лена Афанасьева хас да судаарыстыбаннай наҕараадалаах[1]:
- «Саха Өрөспүүбүлүкэтин доруобуйа харыстабылын туйгуна» түөскэ кэтиллэр бэлиэ (2006);
- Доруобуйа харыстабылын тэрийии уонна мэдэссиинэ билимин эйгэтигэр П. А. Петров аатынан Саха Өрөспүүбүлүкэтин Судаарыстыбаннай бириэмийэтин лауреата (2017);
- Арассыыйа Федерациятын Доруобуйа харыстабылын министиэристибэтин бочуоттаах грамотата (2010);
- «Саха Өрөспүүбүлүкэтин доруобуйа харыстабылын үтүөлээх үлэһитэ» бочуоттаах аат (2018);
- Судаарыстыбаннай Дуума Доруобуйа харыстабылыгар кэмитиэтин бэрэссэдээтэлин Д. А. Морозов махтал суруга (2019);
- Ил Түмэн Судаарыстыбаннай мунньах Бочуоттаах грамотата (2019);
- «Саха сирэ Арассыыйаны кытта 380 сыл» үбүлүөй бэлиэтэ.