Нуучча тылынанАнал бырайыактар
Тылы уларыт
УРУБИИКИ ТУҺУНАН

Андреев Касьян Касьянович

УРУБИИКИ иһигэр маннык араспаанньалаах дьон туһунан ыстатыйалар бааллар, көр Андреев.

Касьян Касьянович Андреев (1919 сыл муус устар 30 күнэ, Маалтааны нэһилиэгэ, Саха АССР — 1992 сыл балаҕан ыйын 6 күнэ) — Аҕа дойду Улуу сэриитин кыттыылааҕа, сержант. Албан аат III истиэпэннээх уордьанын кавалера.

Олоҕун олуктара

1919 сыллаахха муус устар 30 күнүгэр Арҕаа Хаҥалас улууһун (билигин Горнай улууһа) Маалтааны нэhилиэгэр төрөөбүтэ.

Сэрии иннинэ «Маай» холхуос биригэдьииринэн, суотчутунан уонна бырабылыанньатын бэрэссэдээтэлинэн үлэлээбитэ.

1942 сыл бэс ыйын 27 күнүгэр Горнай улууһун байыаннай хамыһарыйаатынан Кыһыл Аармыйаҕа ыҥырыллыбыта. Бойобуой бэлэмнэниини Молотов куорат таһыгар Вершеть станцияҕа баар байыаннай лааҕырга ааспыта[1][2][3].

Аҕа дойду Улуу сэриитигэр

1943 сыл от ыйын 3 күнүгэр Куурускай тоҕойун кыргыһыыларыгар кыттыбыта. 439-с истребительнэй-броневой артиллерийскай полкаҕа, РГК 1-кы туспа истребительнэй-броневой артиллерийскай Слуцкайдааҕы Кыһыл Знамялаах Суворов уордьаннаах биригээдэтигэр бууска наводчигынан уонна разведчигынан сулууспалаабыта.

Киин, 1-кы Украинскай, 1-кы уонна 2-с Белоруссиятааҕы фроннарга сэриилэспитэ. Черниговы босхолооһуҥҥа, Днепри туорааһыҥҥа, Гомель, Могилев, Бобруйск, Мозырь кыргыһыыларыгар, Припять туорааһыныгар кыттыбыта. Слуцкай куорат туһугар кыргыһыыга бааһырбыт наводчигы солбуйан, буусканан икки бүлүмүөт точкатын суох гыммыта, онтон сарсыныгар өстөөх икки тааҥкатын (биирин бэйэтэ) умаппыта. Итинник дьайыыларын иһин III истиэпэннээх Албан аат уордьанынан наҕараадаламмыта. Салгыы Нарваны туораабыта, Варшаваны босхолооһуҥҥа, Висланы туорааһыҥҥа уонна Данцик устуурмугар кыттыбыта. Висланы туорааһыҥҥа атаҕар бааһырбыта, биригээдэ госпиталыгар эмтэммит. «Мертвая Висла» оройуонугар ньиэмэс сэриилэрин төгүрүйүүгэ кыттыбыта, манна уопсайа өстөөх 18 тыһыынча кэриҥэ саллаатын билиэн ылбыттара. Сэрии кэнниттэн Польшаҕа сулууспатын салҕаабыта, минометчик идэтин баһылаабыта.

1946 сыллаахха демобилизацияламмыта, төрөөбүт дойдутугар эргиллибитэ[1][2][3].

Наҕараадалара уонна ытык ааттара

  • III истиэпэннээх Албан аат уордьана;
  • «Хорсунун иһин» мэтээл;
  • «Варшаваны босхолооһун иһин» мэтээл;
  • «1941-1945 сс. Аҕа дойду Улуу сэриитигэр Германияны кыайыы иһин» мэтээл[1][3][4].

Дьиэ кэргэнэ

  • Кэргэнэ — Мария Николаевна Дьяконова, Дьоруой ийэ;
  • Дьиэ кэргэҥҥэ уон оҕо төрөөбүт;
  • Сиэннэриттэн биирдэстэрэ — Никита Викторович Андреев, 2013 сылтан Горнай улууһун баһылыга[3][4].

Быһаарыылар

  1. ↑ 1 2 3 Андреев Касьян Касьянович (рус.). 1418museum.ru. Сигэнии күнэ: 19 Атырдьах ыйын 2026.
  2. ↑ 1 2 Андреев Касьян Касьянович (рус.). Якутия помнит. Сигэнии күнэ: 19 Атырдьах ыйын 2026.
  3. ↑ 1 2 3 4 Андреев Касьян Касьянович (рус.). Семейная реликвия. Сигэнии күнэ: 19 Атырдьах ыйын 2026.
  4. ↑ 1 2 Открылась выставка «Подвиг Великий Вечный» (рус.). Якутский музей. Сигэнии күнэ: 19 Атырдьах ыйын 2026.

Литература

  • Л. Г. Саввинова. Хатан Хаһыйаан — Касьян Касьянович Андреев/ [хомуйан бэчээккэ бэлэмнээтэ Л. Г. Саввинова; ред. Р. Н. Платонов]. — Дьокуускай: Дани-Алмас, 2020. — 256 с.

Категориялар