Алексеев Егор Сидорович

1925 сыллаахха төрөөбүтэ.

Оскуолаҕа киириэҕиттэн Бүлүүтээҕи педучилищены бүтэриэр диэри холкуоска оҕуһу сиэтэн, аты үүрэн, оту оттоон, маһы мастаан улааппыта. Оннооҕор сэрии ыар сылларыгар, училище иккис кууруһун бүтэрэн баран, биир сайын Сталин аатынан холкуоска биригэдьииринэн үлэлээбитэ.

1944 сыллаахха училищены бүтэрбитэ. Ол сыл бэс ыйын 17 күнүгэр Сэбиэскэй аармыйа кэккэтигэр ыҥырыллыбыта, хомсомуолга киирбитэ, комсоргунан үлэлээбитэ.

1945 сыл сайынын устата байыаннай үөрэҕи ааһан, балаҕан ыйыттан рядовой сололоох Японияны утары сэриигэ кыттыбыта.

Забайкальскай фроҥҥа 36 аармыйа наводчигынан сылдьыбыта. 292-с стр. дивизия, 892-с стр. полк. Манчжурияҕа Хайлар куораты ылыыга кыттыбыта. Ол кэнниттэн комендатураҕа сулууспалаабыта. 1948 сыллаахха муус устар 7 күнүгэр старшай лейтенант сололоох демобилизацияланан дойдутугар кэлбитэ.

Оскуолаҕа саха тылын учууталынан үлэлээбитэ. Кэтэхтэн үөрэнэн, учуутал институтун литературнай факультетын бүтэрбитэ.

Быыбарга талыллан, 1960-62 сылларга «Октябрь» холкуос бэрэссэдээтэлин солбуйааччытынан үлэлээбитэ. Эмиэ кэтэхтэн үөрэнэн 1967 сыллаахха Саха судаарыстыбаннай университетын саха тылын уонна литературатын салаатын бүтэрбитэ.

ССКП кэккэтигэр 1952 сыллаахха киирбитэ. Ол күнтэн ыла Егор Сидорович маҥнайгы сүһүөх партийнай тэрилтэ сэкирэтээринэн, сэкирэтээри солбуйааччынан, бюро чилиэнинэн, норуодунай хонтуруол бөлөҕүн бэрэссэдээтэлинэн, пропагандиһынан өр сылларга үлэлээбитэ.

1949 сыллаахтан Эдэр Коммунист, Октябрь суола, Кыым хаһыакка уопсастыбаннай кэрэспэдьиэнинэн үлэлээбитэ. Баппаҕаайы нэһилиэгин, оскуолатын устуоруйаларын, холкуос тэриллиитин устуоруйатын, үлэ, сэрии бэтэрээннэрин ахтыыларын тус-туспа суруйталаабыта.

2001 сыллаахха өлбүтэ^[2].

• Аҕа дойду Улуу сэриитин II истиэпэннээх уордьана;
• «Хорсунун иһин» мэтээл;
• «Японияны кыайыы иһин» мэтээл;
• Забайкальскай фронт бэтэрээнэ;
• Үлэ бэтэрээнэ;
• РСФСР норуодунай үөрэҕэриитин туйгуна;
• Саха АССР физическай култууратын уонна успуордун сайдыытыгар өҥөлөрүн иһин бэлиэ^[2].