Сидоров Егор Сидорович
Егор Сидорович Сидоров (төр. 1927) — тыл үөрэхтээх устуорук учуонай, илиҥҥи тылларга специалист, тылбаасчыт, филология билимин хандьыдаата. Литэрэтиирэни ырытыыга, фольклорга, итэҕэлгэ үлэлэрдээх. Тыыл бэтэрээнэ, үлэ бэтэрээнэ.
Олоҕун олуктара
Бастаан Ташкент университетыгар үөрэнэ сылдьан тюркологиянан, кытай, перс уонна араб тылларынан үлүһүйбүтэ, онтон икки сыл буолан баран Ленинград судаарыстыбаннай университетыгар көспүтэ. Онно үөрэнэ сылдьан дьоппуон, ааҥыл, ньиэмэс тылларын үөрэппитэ, 1962 сыллаахха ситиһиилээхтик бүтэрбитэ.
Ленинградка үөрэҕин бүтэрбитин кэннэ, 1962 сылтан Саха судаарыстыбаннай университетын бүтүн устуоруйа кафедратыгар преподавателинэн үлэлээбитэ.
1988 сыллаахха өрөбөлүүссүйэ иннинээҕи Саха сирин уопсастыбаннай санаатын устуоруйатыгар хандьыдаат диссертациятын көмүскээбитэ.
1995 сылтан 2006 сылга диэри Егор Сидорович СГУ филологическай факультетын уопсай тыл үөрэҕин уонна риторика кафедратын иһинэн этносемиотика үөрэх-наука лабораториятыгар доцен быһыытынан үлэлээбитэ.
Егор Сидоров саха уонна атын алтай тылларын тэҥнээн-историческай чинчийиигэ, литэрэтиирэ үөрэҕэр, фольклористикаҕа, итэҕэл үөрэҕэр анаммыт элбэх билим үлэ ааптара. Өксөкүлээх «Ойуун түүлүн» нууччалыы тылбаастаабыта, устуоруйа уонна тыл өттүттэн ырытыы оҥорбута, Кындыл Уйбаан айымньыларын, олоҥхолору тылбаастаабыта[1].