Сивцева-Мигалкина Сардаана
Сардаана Яковлевна Сивцева-Мигалкина (1965, Уус-Алдан улууһа, Саха АССР) — телесуруналыыс, суруйааччы, киинэ сынарыыһа. Кэпсээн суруйар айар аата Даана Сард.
Олоҕун олуктара
1965 сыллаахха Уус-Алдан улууһун Бороҕонугар төрөөбүтэ.
Оскуола кэнниттэн Владивосток куоракка Дальнай Восток государственнай университетын журналистикаҕа факультетын бүтэрбитэ.
«Саха» национальнай көрдөрөр-иһитиннэрэр компаниятын телевидениетыгар «Сардаана» диэн субуота аайы отучча мүнүүтэ көстөр бэйэтин биэриитин ыытара. Онно интириэһинэй дьарыктаах, дьылҕалаах, санаалаах-оноолоох диэбит дьоннорун көрдөрөр. Биэриитин геройдарын түмэн 2002 сыллаахха Москваҕа «Жизнь прекрасна» диэн кинигэ таһаартарбыта. Бу кинигэҕэ «Хотугу Форум» Анкоридж куоракка (АХШ) баар офиһын Саха сириттэн бэрэстэбиитэлэ Анастасия Божедонова, «Далбар Хотун» сурунаал редактора Аита Шапошникова, артыыскалар Аиза Решетникова уонна Зоя Багынанова, суруналыыс, ырыаһыт Яна Угарова уо.д.а. киирбиттэр.
Үлэтин таһынан икки сыл курдук «Молодежь Якутии» хаһыакка «Сардаана» диэн бэйэтэ анал рубрикалаах этэ. 2006 сыл түмүгэр «Силис» диэн нууччалыы тахсар чааһынай сурунаалга кылаабынай редактор буолбута. Бу сурунаал ис хоһооно — чөл олох, медицина, ыарахан түгэннэртэн кыайыылааҕынан тахсыбыт дьон, төрөөбүт сирдэрин, силистэрин умнубатах дьон уо. д. а.
Айар үлэтэ
2006 сыллаахха «Ситим» Медиа-группа «Күрүлгэн» диэн уус-уран альманаҕар үс айымньыта тахсыбыта.
Айымньылара
- Күрүлгэн. Уус-уран альманах. Редактор А. Г. Гуринов. 2 чаастаах. Дьокуускай: Ситим Медиа, 2006.
Бастакы чааһыгар киирбит кэпсээннэр: Ааспыт ааспат амтана, 7—30 с. Хаһан да хойут буолбатах, 31—56 с. Иккис чааһыгар киирбит: Сүрэх таптыыр аналлаах, 5—47 с.
- Кофе со сливками. Дьокуускай: Ситим Медиа, 2006. (Бу кинигэҕэ С. Сивцева-Мигалкина 16 интервьюта киирбитэ, олор истэригэр бырааттыы Мигалкиннары, үөрэҕирии миниистрэ Феодосия Габышеваны, ырыаһыт Аскалон Павловы, издатель Леонид Левины уо.д.а. кытта кэпсэтиилэрэ).
- Жизнь прекрасна. Москва: Стерх, 2002.
Сценарий ааптара
- «Ааспыт ааспат амтана»;
- «Сүлүһүннээх таптал»;
- «Мин таптыыр спутнигым» (2021);
- «Күннэй» (2022).
Тус олоҕо
- Икки оҕолоох: Туйаара уонна Василий.
Наҕараадалара уонна үтүө ааттара
- Саха Өрөспүүбүлүкэтин үтүөлээх суруналыыһа (2019)[1].