Попов Илья Андреевич
Попов Илья Андреевич (1910 с. бэс ыйын 20 күнэ Уһун Күөл нэһилиэгэ, Сунтаар оройуона, Саха АССР — 1970 с.) — Саха АСС үтүөлээх учуутала, РСФСР норуотун үөрэҕириитин туйгуна.
Олоҕун олуктара
1910 сыллаахха бэс ыйын 20 күнүгэр Сунтаар улууһун Уһун Күөл нэһилиэгэр төрөөбүтэ.
1919—1920 сс. — Кутана биир кылаастаах оскуолатын үөрэнээччитэ. Оскуола 7 кылааһын бүтэрэн баран, Бүлүү куоратыгар педтехникумҥа үөрэммитэ.
1929 сыллаахха — Бүлүүчээн трудовой оскуолатыгар учууталынан үлэлээбитэ. Оҕолору үөрэтэрин таһынан, нэһилиэккэ политическай бэсиэдэлэри ыытара, драматическай куруһуогу үлэлэтэрэ.
1932 с. — Үөһээ Мэйик оскуолатын директора[1].
1935 с. — Тойбохой оскуолатыгар саха тылын, географияны үөрэппитэ. Бу оскуолаҕа Илья Андреевич оройуоҥҥа бастакы саха тылын уонна литературатын кабинетын тэрийбитэ. Манна үөрэтии араас ньымаларын туһунан брошюралар, хаһыаттартан ыстатыйалар, научнай-методическай дакылааттар мунньуллубуттара. Илья Андреевич саха тылын учууталларын оройуоннааҕы түмсүүлэрин холбоһугун салайара.
1936—1939 сс. — Тойбохой оскуолатын завуһа.
1936 с.- Г. Е. Бессоновы кытары оскуолаҕа краеведческай үлэни сүрүннэспитэ, кыраайы үөрэтэр походтарга сылдьыһара, араас былыргы сэһэннэри хомуйара.
1941 с. — Дьокуускайдааҕы педучилищены үөрэнэн бүтэрэр.
1947—1954 сс. — Тойбохойдооҕу оҕо дьиэтин үөрэх чааһын сэбиэдиссэйэ.
1959 сылтан — Сунтаардааҕы санаторно-лесной оскуолаҕа иитээччинэн, завуһунан үлэлиир.
Попов И. А. аҕатын — народнай учуутал Андрей Николаевич Попову утумнаан, дьиҥнээх мындыр, талааннаах, оҕоҕо олус чугас учуутал эрэ буолбакка, дьиҥнээх аҕа табаарыс, сүбэһит этэ.[2]
Наҕараадалара, ытык ааттара
- Саха АССР оскуолаларын үтүөлээх учуутала.
- РСФСР норуот үөрэҕириитин туйгуна.
Кини туһунан
- Үтүөкэннээх киһи, уһулуччулаах учуутал үйэлээх суола / хомуйан оҥордо : И. И. Попова. — Дьокуускай : Дани-Алмас, 2021 — 280с.