Захаров Пётр Иванович (быраас)
Захаров Петр Иванович (төр. 1950 сыл олунньу 14 күнэ, Тыайа, Саха АССР) — Мэдэссиинэ Киинин кардиохирургияҕа салаатын сэбиэдиссэйэ. Саха Өрөспүүбүлүкэтин ытык киһитэ. Мэдэссиинэ билимнэрин дуоктара.
Олоҕун олуктара
Петр Иванович 1950 сыллаахха олунньу 14 күнүгэр Кэбээйи улууһун Тыайа нэһилиэгэр төрөөбүт.
Орто оскуоланы бүтэрэн баран производстваҕа үлэлээбитэ, онтон Сэбиэскэй Аармыйа кэккэтигэр сулууспалаабыта.
1977 сылга Томскайдааҕы судаарыстыбаннай мэдэссиинэ институтун бүтэрбитэ.
Үлэтэ
Дьокуускай куорат клиническай балыаһатыгар хирург быһыытынан үлэтин саҕалаабыта.
1982—1984 сс. А. Н. Бакулев аатынан Сүрэх-тымыр хирургиятын Национальнай мэдэссиинэ чинчийэр киинигэр «Сүрэх-тымыр хирургията» испэсээлинэскэ клиническай ординатураны ааспыта[1].
1992 сылга Национальнай мэдэссиинэ киинин аһыллыаҕыттан ыла П. И. Захаров тымыр хирургиятын салаатын сэбиэдиссэйинэн анаммыта[2].
1998 сылга Захаров Арассыыйа билим академиятын академига А. В. Покровскай салайыытынан, Москва куоракка А. В. Вишневскэй аатынан хирургия институтун базатыгар «Сравнительный анализ хирургического и консервативного лечения каротидных стенозов» диэн тиэмэҕэ хандьыдаат диссертациятын көмүскээбитэ.
2014 сылга П. И. Захаров «Оптимизация методов хирургического лечения пороков сердца и сосудов в условиях Арктики и Субарктики на примере Республики Саха (Якутия)» диэн тиэмэҕэ дуоктар диссертациятын ситиһиилээхтик көмүскээбитэ.
2018 сылга Захаров салайааччылаах быраастар хамаандалара Уһук Илиҥҥэ бастакы трансплантация эпэрээссийэтин оҥорбута[1].
Кинигэлэрэ
2017 сылга «Киһи соҕотох сүрэхтээх» диэн кинигэни суруйбута.
2024 сылга «Cүpэх хирург хараҕынан» диэн кинигэни таһаарбыта[2].
Наҕараадалара уонна ытык ааттара
- «Владимир Ильич Ленин төрөөбүтэ 100 сылын бэлиэтигэр» мэтээл;
- Саха Өрөспүүбүлүкэтин Доруобуйа харыстабылын туйгуна (1995);
- Саха Өрөспүүбүлүкэтин бириэмийэтин лауреата (1999);
- Саха Өрөспүүбүлүкэтин үтүөлээх бырааһа (2001);
- Саха Өрөспүүбүлүкэтин ытык киһитэ (2004);
- Арассыыйа Федерациятын Доруобуйа харыстабылын туйгуна (2008);
- Арассыыйа Федерациятын үтүөлээх бырааһа (2011).