Нуучча тылынанПартнёрдар бырайыактараАнал бырайыактар
Тас көрүҥүн уларытТылы уларытИһитиннэрии
УРУБИИКИ ТУҺУНАН

Готовцев Роман Ильич

УРУБИИКИ иһигэр маннык араспаанньалаах дьон туһунан ыстатыйалар бааллар, көр Готовцев.

Готовцев Роман Ильич — Мындыр Уус (1960 балаҕан ыйын 3) — хомус оҥорор уус, Арассыыйа норуотун маастара, аан дойдутааҕы хомус маастара[1][2].

Олоҕун олуктара

1960 сыллаахха балаҕан ыйын 3 күнүгэр Уус-Алдан улууһун Танда сэлиэнньэтигэр сулууспалаах дьиэ кэргэҥҥэ төрөөбүтэ.

Оскуола кэмигэр Г. Н. Бурцев салайар куруһуоктарыгар дьарыктаммыта. Дьокуускайдааҕы уус-уран училищены бүтэрбитэ[1].

1984 сыллаахха «Сардаана» фабрикаҕа уҥуохтан оҥоһуктары оҥорор маастар үөрэнээччитинэн үлэтин саҕалаабыта. Кэлин киэргэл оҥоһуктары уонна хомуһу оҥорор үлэни баһылаабыта; хомуһу охсууга Я. К. Прокопьевтан үөрэммитэ. 1989 сыллаахха оҕо хомуһугар авторскай дастабырыанньа ылбыта[1].

2018 сылтан «Айар уустар» Креативнай индустрия кэллиэһигэр учууталынан үлэлиир.

Уус-уран үлэтэ

1991 сыллаахха хомус аан дойдутааҕы иккис кэнгириэһигэр «Аан дойду бастың хомуһа» күрэҕэр иккис миэстэни ылбытп, аан дойдутааҕы маастар аатын ылбытп. 1993 сыллаахха Аляскаҕа, 1994 сыллаахха Францияҕа ыытыллыбыт бэстибээллэргэ кыттыбыта[1].

Оҕолору хомус оҥорорго үөрэтэрэ. 2012 сыллаахха хомус маастардарын күрэҕэр кини үөрэнээччилэрэ Иван Неустроев, Эдуард Тарабукин уонна Василий Уаров бастакы үс миэстэни ылбыттара[2].

Хомуһу оҥорууга уонна бу инструменҥа оонньооһуҥҥа норуоттар икки ардыларынааҕы кылаастаах маастар, хомусчут. Өрөспүүбүлүкэтээҕи уонна норуоттар икки ардыларынааҕы күрэхтэр, сэминээрдэр уонна быыстапкалар кыттыылаахтара уонна кыайыылаахтара. Хомуһу уонна муоһунан кыһан оҥоһуктары таһынан, саха быһаҕын оҥоруунан, маһынан кыһан оҥоруунан уонна ювелирнай оҥоһуктарынан дьарыктанар.

2022 сылтан, «кылыһах-кырыымпа» диэн саха струналаах-ыллыыр үнүстүрүмүөнүн тарҕатар уонна өйүүр сыалтан, ону оҥорон саҕалаабыта. Инструмент ньуоскалыы хаһыллыбыт, тириэ бүрүөһүннээх куорпустаах, чыычаах төбөлөөх уһун моойдоох, ат сиэлиттэн оҥоһуллубут икки кылыстаах.

Р.И. Готовцев мас иһити, төрүт ох сааны уонна «кылыһах-кырыымпа» мусукаалынай үнүстүрүмүөнү оҥорооччу маастардарга аналлаах I өрөспүүбүлүкэтээҕи «Мас уустарын тойуга» күрэх ааптара уонна тэрийээччитэ (2024 с.)[3].

Саха сирин уустарын идэлээх холбоһуктарын бэрэссэдээтэлэ[4].

Быһаарыылар

  1. ↑ 1 2 3 4 Готовцев Роман Ильич (рус.). Симэх — Норуот уус-уран уһаныытын киинэ. Сигэнии күнэ: 30 Балаҕан ыйын 2026.
  2. ↑ 1 2 Итоги конкурса мастеров-изготовителей хомуса (рус.). Саха норуотун хомуһун музейа уонна киинэ. Сигэнии күнэ: 30 Балаҕан ыйын 2026.
  3. ↑ Электронная библиотека "Усть-Алданской МЦБС" - Культура, искусство(биллибэт). e.uacbs.ru. Сигэнии күнэ: 30 Балаҕан ыйын 2026.
  4. ↑ Якутский хомус получил патент на изготовление с географическим указанием (рус.). ГТРК «Саха». Сигэнии күнэ: 30 Балаҕан ыйын 2026.

Категориялар