Аргунов Пантелеймон Никифорович
Билэ:Аргунов Пантелеймон Никифорович.jpg
Аргунов хаартыската
Аргунов Пантелеймон Никифорович — Саха АССР оскуолаларын үтүөлээх учуутала, Иккис Аан дойду сэриитин кыттыылааҕа, бастаан Арҕаа фроҥҥа, онтон Японияны утары сэриигэ кыттыбыта.
1910 сыллаахха Илин Хаҥалас улууһун (билигин Мэҥэ-Хаҥалас улууһа) Лоомтука нэһилиэгэр төрөөбүтэ.
Оскуола иннинээҕи үөрэҕи дьиэтигэр олорон ылбыта, онтон Эмис-Тыыллыма таҥара дьиэтин-приходской оскуолатыгар үөрэммитэ, онно учууталынан кини аҕата Аргунов Никифор — аҕабыыт үлэлиир этэ (Мэҥэ-Хаҥалас улууһугар Бүтэйдээххэ уонна Нам улууһун Улуу Сыһыытыгар таҥара дьиэлэрин туттарбыт, Мэҥэ-Хаҥаласка хас да оскуоланы тэрийсибит киһи).
1939 сыллаахха Бэрдьигэстээх сэттэ кылаастаах оскуолатыгар учууталынан үлэҕэ киирбитэ, 1941 сыллаахха Горнай улууһун норуот үөрэҕириитин оройуоннааҕы салаатын иниспиэктэринэн анаммыта.
Ол сыл Нам военкоматынан Аҕа дойду Улуу сэриитигэр ыҥырыллыбыта. 1945 сыллаахха демобилизацияламмыта. Бастаан фашистскай Германияны утары сэрии фронугар, онтон Японияны утары сэриигэ войсковой чаастар штабтарыгар старшай писарь, сержант дуоһунастаах. Ол туһунан «Сахаполиграфиздат» 1995 сыллаахха таһаарбыт «Уоттаах сэрии сылларыгар» диэн (редактор Алексеев В. И.) Горнай улууһун «Өйдөбүнньүк» кинигэтигэр суруллубут.
1945-1948 сс. Бэрдьигэстээх орто оскуолатыгар учууталлаабыта. Өр сылларга үөрэҕирии, култуура салааларыгар үлэлээбитэ.
1968 сыл ахсынньы 18 күнүгэр ыалдьан өлбүтэ.
Наҕараадалара уонна ытык ааттара
- Саха АССР оскуолаларын үтүөлээх учуутала (1967).
Уруулара-аймахтара
Бииргэ төрөөбүт быраата Аргунов Евстафий Никифорович Аҕа дойду улуу сэриитигэр 1942 сыллаахха ыҥырыллыбыт. 1943 сыллаахха 23 сааһыгар Украинаны босхолуур сэриигэ олоҕун толук уурбута. Донецкай уобаласка көмүллэ сытар. Кэнниттэн олоҕун салгыыр киһини хаалларбатах.
Пантелеймон Никифорович кэргэнэ Софьялыын түөрт оҕоломмуттар. Улахан кыыстара Надежда Пантелеймоновна кэргэнэ Ядреев Сив Петровичтыын Намҥа олорбуттара. Станислав уонна Александр диэн уолаттардаахтар. Клавдия Пантелеймоновна диэн иккис кыыһа Бэрдьигэстээххэ олорбута. Кэргэнэ Павлов Василийдыын түөрт оҕоломмуттара: икки уол, икки кыыс. Үһүс кыыһа Виктория Пантелеймоновна кэргэнэ Саввин Алексей Дмитриевичтыын алта оҕоломмуттара. Саамай улаханнара — Пестрякова София Алексеевна, эһэтин идэтин салҕаан 27-с сылын оскуолаҕа үлэлиир. Майа Ларионов аатынан орто оскуолатын алын кылааһын учуутала.. Уола Аргунов Евстафий Пантелеймонович, Амма сэлиэнньэтигэр олорор. Өр сылларга Амма главнай бырааһынан үлэлээбитэ. Вера, Пантелеймон уонна Надежда диэн оҕолордоох.