Аксой Саадет

Саадет Аксой аҕата Невшехира диэн куораттан төрүттээҕэ, ийэтэ Эдирнэ уонна Сиирта куораттартан төрүттээҕэ^[2]. Артыыс дьыалатынан Саадет өссө оскуола сылларыттан саҕалаан сэҥээрэн, дьарыктанан киирэн барбата. Кини хас даҕаны төгүл турок чааһынай ханаалларыгар муусука уонна киинэ туһунан шоуларга кыттыбыта. Институту бүтэрэн баран Саадет Аксой бэйэтин анал, идэтийбит киинэ эйгэтигэр холонон көрөргө санаммыта. Ол иннинэ институкка сылдьан артыыс маастарыстыбатын чочуйар араас куурустарга, маастар кылаастарга сылдьыбыта, дьарыктаммыта. Хас да төгүл реклама ролига уһуллуутугар кыттыбыта, сэрийээллэргэ, кылгас кэрчиктээх киинэлэргэ холонон көрбүтэ.

2002 уонна 2004 сыллар быыстарыгар кини 1 ханаалга тэлэбиисэргэ аан бастакытын ыытааччы быһыытынан тахсыбыта. Ол кэнниттэн 2005 сыллаахха Саадет Аксой аан бастакытын артыыс быһыытынан «Осенний огонь» киинэҕэ оонньообута. 2006 сылаахха Саадет АХШ-ҕа көһөн барбыта уонна Нью-Йорк киинэ академиятыгар үөрэҕин саҕалаабыта. Кэлиҥҥи сылларга кини турок киинэ сэрийээллэригэр элбэхтик уһуллубута. Ол иһигэр маннык биллэр киинэлэр бааллара: Senden Baska, Kalpsiz Adam, Balkan Wedding.

2012 сыллаахха Саадет Рождённый дважды диэн ааттаах Серджио Кастеллитто киинэтигэр уһуллубута. Онно кини Аски диэн кыыс оруолун толорбута. Кини Арассыыйа көрөөччүлэригэр, бастатан туран, «Великолепный век» диэн элбэх сиэрийэлээх киинэҕэ оонньообутунан биллэр уонна аатырар.

Босфор университетын (ааҥыл тылын уонна литэрэтиирэтин кафедрата) бүтэрбитэ. Хас да наҕараадалаах.

2015 сыл ахсынньы 14 күнүгэр Саадет Памир Киранер диэн киһиэхэ кэргэн таҕыспыт. 2020 сылга ыал кыыстаммыта^[3].