Азаров Михаил Дмитриевич

Азаров Михаил Дмитриевич (1877- биллибэт) — ВЯОНУ чилиэнэ, Гражданскай сэрии кыттыылааҕа, учуутал.

М. Д. Азаров 1877 с. Нам улууһун 2 Хомустаах нэһилиэгэр төрөөбүтэ. Дьокуускай куорат икки кылаастаах оскуолатын бүтэрбитэ. 1901 сылтан учуутал стажтааҕа.

М. Д. Азаров 1904 с. Мэҥэ улууһун «Соло» диэн сиргэ Ф. Г. Сивцев — Сүөдэр Аҕабыты уонна кини кэргэнин А. И. Сивцеваны кытта бииргэ учууталлаабыттарын туһунан «Школьный листок за 1904 год» диэн отчуот-докумуоҥҥа үчүгэйдик ахтыллар.

М. Д. Азаров Мэҥэ улууһун 1907 с. тэриллибит Төҥүлү оскуолатын саамай маҥнайгы учуутала. Кини элбэх сыл араас оскуолаларга учууталлаабыт. Элбэх бэлиэ, үчүгэй дьону иитэн-үөрэтэн таһаарбыт үтүөлээх-өҥөлөөх. М. Д. Азаров 1921-22 сылларга повстанчествоҕа салайар үлэҕэ активнай кыттыыны ылбыта. ВЯОНУ чилиэнинэн буолбута. Ол аата повстанчество правительствотыгар — саамай үрдүкү салалтаҕа үлэлээбитэ. Кэлиҥҥи дьылҕата биллибэт^[1].