Семенов Сергей Иннокентьевич
Сергей Иннокентьевич Семёнов (1960 сыл муус устар 1 күнэ, Эдьигээн, Саха АССР) — арассыыйатааҕы инфекционист быраас, Саха сиригэр вируснай гепатиты чинчийэр учуонай, мэдиссиинэ билимин дуоктара[1].
Олоҕун олуктара
1960 сыллаахха муус устар 1 күнүгэр Эдьигээн улууһун Эдьигээн нэһилиэгэр төрөөбүтэ. Төрөппүттэрэ эрдэ өлөннөр икки убайын уонна эдьиийин кытта эбэлэригэр иитиллибиттэрэ.
Эдьигээн орто оскуолатын бүтэрэн баран Саха судаарыстыбаннай университетын мэдиссиинэ факультетыгар үөрэнэ киирбитэ[1].
Өр сылларга Дьокуускай 1 нүөмэрдээх клиническэй балыыһа Инфекция салаатыгар үлэлээбитэ, уустук ыарыһахтары эмтээн санитарнай авиацияннан Саха сирин улуустарын барытын кэрийбитэ. Булуҥ улууһун кылаабынай бырааһынан, Эдьигээн оройуонун балыыһатыгар үлэлээбитэ.
2009 сылтан М. К. Аммосов аатынан Хотугу-Илиҥҥи федеральнай университет Доруобуйа билим-чинчийэр институтугар билим сүрүннүүр үлэһитинэн үлэлиир[1].
Чинчийэр үлэтэ
2000 сыллаахха Санкт-Петербурга хроникалыы дельта-гепатит туһунан кандидатскай диссертациятын көмүскээбитэ[1]. 2007 сыллаахха Москваҕа «Эпидемиологические особенности и клиническая характеристика вирусных гепатитов В, С и дельта в Республике Саха (Якутия)» тиэмэҕэ дуоктар диссертациятын көмүскээбитэ[2].
Чинчийэр үлэтэ вируснай гепатиттар үөскүүлэригэр, тарҕаныыларыгар, патогенезтарыгар, диагностикаларыгар, сэрэтиигэ уонна эмтээһиҥҥэ сыһыаннаах[1].
Тас дойдулар уонна Арассыыйа учуонайдарын кытта элбэх чинчийиилэри ыытан, ол түмүгүнэн араас таһымнаах кэмпириэнсийэлэргэ дакылаат оҥортуур, аан дойду уонна Арассыыйа билим сурунаалларыгар ыстатыйалара тахсаллар.
Дьиэ кэргэнэ
- Аҕата — Иннокентий Степанович, Куонараттан төрүттээх Орбодо ойуун (Семенов Степан Семенович) уола;
- Ийэтэ — Мария Афанасьевна, Иван Канин диэн Иркутскайтан төрүттээх сыылынай сиэнэ;
- Эбэтэ — Филиппова Ульяна Гаврильевна.
Наҕараадалара уонна ытык ааттара
- СӨ доруобуйатын харыстабылын туйгуна;
- Мэдиссиинэ билимин дуоктара.