Ракитин Василий Александрович

Васи́лий Алекса́ндрович Раки́тин (? — 1923) — Нуучча байыаннай салайааччыта. Аан дойду маҥнайгы сэриитин, Гражданскай сэрии илиҥҥи фронун кыттыылааҕа. Үрүҥ гвардеец.

1918 сыл тохсунньутугар, Иркутскайдааҕы кистэлэҥ тэрээһин ротатын командира буолан, бассабыыктары утары охсуһууга туруммута. 1918 сыл от ыйын 1 күнүгэр, Иркутскайга Сэбиэскэй былааһы суулларалларыгар, Василий Ракитин капитан чыыныгар сылдьара. 1918 сыл күһүнүгэр 12-с Верхнеудинскайдааҕы стрелковай полка хамандыырынан анаммыта. 1919 сыл тохсунньутугар В.Ракитин полковник чыыныгар таһаарыллыбыта, ол кэнниттэн 3-с Иркутскайдааҕы уонна 15-с Воткинскайдааҕы стрелковай дивизиялар холбоһуктарын командующайа буолбута. Тохсунньу ыйтан 1921 сыл балаҕан ыйын 21 күнүгэр дылы 3-с Иркутскайдааҕы стрелковай дивизияны хамаандалаабыта. Ити кэмҥэ кини генерал буолбута. Ол кэнниттэн Ракитин 2-с стрелковай корпус Иркутскайдааҕы стрелковай полкатын хамаандалаабыта. 1921 сыл бэс ыйын 21 күнүгэр диэри Приамурскайдааҕы Временнэй правительство сэриилэрин дьаһайсар генералынан сылдьыбыта.

1922 сыл сайыныгар генерал Пепеляев «Татарскай проливтааҕы милициятыгар» киирбитэ уонна олору кытары Саха сиригэр барсыбыта. 1922 сыллаахха балаҕан ыйын 6 күнүгэр Охуоскайдааҕы десаҥҥа кыттыбыта. Охуоскайга Ракитин генерал Саха сиригэр Амма-Охуоскай суолунан Дьокуускайга тиийэ киириэхтээх бөлөҕү баһылаабыта. Ол бөлөх дьону үрүҥнэр диэки эргитэн, кыһыллары утары бартыһааннааһыны тэрийиэхтээх этэ. Ракитин бэйэтин бөлөҕүн хамаандалаан, тайҕанан айаннаан тиийэн Чурапчыны ылбыта. Ол эрээри, олунньуга оччолорго Төҥүлүгэ баар Мэҥэ улууһун быраабатын ылаары сэриигэ хотторон Дьокуускайга тиийэр былаана тохтубута. Пепеляевка Мэҥэ быраабатыгар кыайтарбытын туһунан отчуотугар сахалары буруйдаабыт, сатаан сэриилэспэттэр, куттастар диэбит^[1].

Ол кэнниттэн, 1923 сыл олунньу 27 күнүгэр куораттан тахсыбыт кыһыл этэрээтэ кинини Чурапчыттан үтүрүйэн, төттөрү Охуоскайга чугуйарга күһэллибитэ.

1923 сыл бэс ыйын 5 күнүгэр Владивостоктан борохуотунан Охуоскайга Степан Вострецов хамандыырдаах кыһыллар этэрээттэрэ эмискэ тиийэн кэлэн үрүҥнэри үлтүрүппүтэ. Ракитин кыһылларга бултуу сылдьан түбэспитэ уонна бэринимээри булт саатынан бэйэтин искэ ытыммыта. Ол бааһырыытыттан 1923 сыл бэс ыйын 7 күнүгэр Охуоскайга өлбүтэ.