Заха Хадид
Заха Хадид — Ираактан төрүттээх араб омуктаах Улуу Британия улуу архитектора, толору аата Дама Заха Мохаммад Хадид (ааҥл. Zaha Mohammad Hadid), 1950 сыллаахха Алтынньы 31 күнүгэр Багдадка төрөөбүтэ, кулун тутар 31 күнүгэр 2016 сыллаахха Майами куоратка сүрэҕэ тохтоон өлбүтэ.
Биографията
Заха Хадид Ирак Багдад куоратыгар баай ыалга төрөөбүтэ. Ийэтэ, Ваджиха Аль-Сабунджи, худуоһунньук этэ. Аҕата, Мухаммад Аль-Хадж Хусейн Хадид, Ирак Национальнай Демократическай Партиятын тэрийээччилэриттэн биирдэстэрэ этэ. Багдад куоракка Франция манастыырын оскуолатыгар үөрэммитэ, онтон Бейрутка баар Америка институтугар математика салаатыгар киирбитэ. Онтон Лондонҥа Архитектурнай Ассоциация оскуолатыгар үөрэммитэ, онно Рем Кулхаас уонна Элия Зенгелис курдук маастардарга үөрэммитэ. Кини үөрэҕин бүтэрэр үлэтэ Темза өрүс үрдүнэн "Малевич тектониката" диэн ааттаах гостиница муостатын тутуу былаана этэ.
Архитектура оскуолатын бүтэрэн баран, Заха бэйэтин наставнигар, биллэр Голландия архитектора Рем Кулхаас куорат архитектууратын офиһын (ОМА) бырайыактыыр тэрилтэтигэр киирбитэ. 1980 сыллаахха Хадид Zara Hadid Architects диэн бэйэтин тэрилтэтин арыйбыта. Кини бырайыагынан бастакы дьиэ 1993 сыллаахха тутуллубута. АХШ-ка Розенталь аныгы искусствотын киинин тэрийэн баран Хадид аан дойдуга биллэр буолбута.