Доҕордоһуу уордьана
Доҕордоһуу уордьана — Арассыыйа Федерациятын судаарыстыбаннай наҕараадата. Стаатуһунан бэһис миэстэҕэ Бочуот уордьанын кэнниттэн турар.
Норуоттар доҕордоһууларын уордьанын оннугар кулун тутар 2 күнүгэр 1994 сыллаахха олохтоммута.
Эскиис ааптара — худуоһунньук Александр Борисович Жук (сэбиэскэй уордьаны эмиэ кини оҥорбута).
Арассыыйа уонна омук дойдуларын гражданнарыгар маннык түгэҥҥэ туттарыллар:
- омуктар ыккардыларыгар эйэни, доҕордоһууну, бииргэ үлэлээһини, өйдөһүүнү олохтооһуҥҥа улахан өҥөлөрүн иһин;
- омуктар култуураларын бэйэ-бэйэлэригэр чугаһатыы, сайыннарыы иһин;
- Арассыыйа култууратын уонна устуоруйатын чөл хаалларыыга, сайыннарыыга уонна тарҕатыыга көхтөөх үлэ иһин;
- килбиэннээх үлэ иһин;
- билими, үөрэҕириини, доруобуйа харыстабылын уонна култуураны сайыннарыы иһин;
- Арассыыйа Федерациятыгар бөдөҥ экономическэй бырайыактары оҥоруу уонна үбү-харчыны киллэрии иһин;
- киэҥ далааһыннаах үтүөнү оҥоруу иһин.
Наҕараадаламмыттар
Бастакынан наҕараадаламмыт — Самара уобалаһын администрациятын баһылыга Константин Титов (РФ Бэрэсидьиэнин 01.11.1994 сыл № 2050 Ыйааҕа).
Икки төгүл наҕараадаламмыттар
- Багров, Леонид Васильевич, РСФСР өрүс флотун миниистирэ (30.12.1995, 09.07.2002).
- Баталова, Рима Акбердиновна, чэпчэки атлетикаҕа паралимпийскай спортсменка, 2006 сыл атырдьах ыйын 10 күнүгэр — физическэй култуураны уонна успуорду сайыннарыыга улахан кылааты иһин, Афиныга буолбут XII Паралимпийскай оонньууларга үрдүк спортивнай көрдөрүүлэрин иһин; 2010 сыл атырдьах ыйын 23 күнүгэр — физическэй култуураны уонна успуорду сайыннарыыга уонна өр сыллаах бэриниилээх үлэтин иһин.
- Кокошин, Андрей Афанасьевич, политолог.