Афанасьев Василий Егорович
Олоҕун олуктара
1957 сыллаахха сэтинньи 19 күнүгэр Үөһээ Бүлүү улууһун Боотулуу нэһилиэгэр төрөөбүтэ.
1965-1975 сс. Боотулуу орто оскуолатыгар үөрэммитэ. Магадааҥҥа пединститут физико-математическай факультетыгар туттарсан киирбитэ. Икки сыл устата баскетболга уонна волейболга дьарыктаммыта, онтон боксаҕа көспүтэ.
1980 сыллаахха үөрэҕин бүтэрэн, физика уонна математика учууталынан Мэҥэ-Хаҥалас улууһун Төхтүр орто осуолатыгар үлэтин саҕалаабыта.
Сэбиэскэй Сойуус, Россия элбэх арааһынай таһымнаах күрэхтэһиилэригэр ситиһиилээхтик кыттыбыта. Ол курдук, Россияҕа 2 миэстэлэнэн, ССРС спордун маастара буолбута, Россия тыатын сирин спортсменнарын ортотугар бастаабыта, ССРС тыатын сирин спортсменнарын ортотугар икки төгүл бастаабыта уонн Ленинградка, Москваҕа, Барнаулга, Кишиневка уо.д.а. куораттарга буолбут Бүтүн Сойуустааҕы күрэхтэһиилэргэ бастаабыта, миэстэлэспитэ.
Төхтүр орто оскуолатыгар икки сыл үлэлээн баран, Майаҕа спорт оскуолатын ыстаарсай тренерэ, спорт оскуолатын дириэктэрэ буолбута. Онтон 1992 с. Майаҕа саҥа тэриллибит гимназия дириэктэрин солбуйааччы буолан үлэлээн испитэ. Ол үлэтинэн Дьокуускайга командировкаҕа кэлэ сылдьан, 1993 с. алтынньытыгар биһиги кэккэбититтэн хомолтолоохтук өлөн туораабыта.