Нуучча тылынанАнал бырайыактар
Тылы уларыт
УРУБИИКИ ТУҺУНАН

Постников Федор Федорович

Фёдор Фёдорович Постников — Арчы Сүөдэр (1936 сыл бэс ыйын 20 күнэ, Таатта улууһа, Саха АССР — 2012 сыл балаҕан ыйын 30 күнэ) — саха сэбиэскэй уонна Арассыыйа суруйааччыта, педагогическай үлэ бэтэрээнэ. Арассыыйа суруйааччыларын сойууһун чилиэнэ.

Олоҕун олуктара

1936 сыллаахха бэс ыйын 20 күнүгэр Таатта улууһун Иккис Байаҕантай нэһилиэгин Кутаакы диэн сиригэр төрөөбүтэ.

Уус-Таатта сэттэ кылаастаах оскуолатын, онтон Ытык Күөл орто оскуолатын бүтэрбитэ. 1955 сылтан оройуоннааҕы «Коммунист» уонна «Кыым» хаһыаттарга уопсастыбаннай кэрэспэдьиэнинэн үлэлээбитэ[1].

1962 сыллаахха Саха судаарыстыбаннай университетын устуоруйа-тыл факультетын саха салаатын бүтэрбитэ. Устудьуоннуур сылларыгар «Сэргэлээх уоттара» литература түмсүүт8гэр дьарыктаммыта.

Университет кэнниттэн 20 сыл устата Уус-Таатта уонна Таатта Төрдүгэр оскуолаларыгар учууталынан, үөрэх чааһын сэбиэдиссэйинэн, Хара-Алдан оскуолатын дириэктэринэн үлэлээбитэ. Кэлин өрөспүүбүлүкэтээҕи кинигэ кыһатыгар уонна Уус-Таатта сельпотугар үлэлээбитэ[2].

2012 сыллаахха балаҕан ыйын 30 күнүгэр олохтон туораабыта[1].

Айар үлэтэ

Айар үлэнэн 1986 сылтан дьарыктаммыта. 130-тан тахса кэпсээни, 4 сэһэни суруйбута. Оҕо суруйааччытын быһыытынан К. Туйаарыскай аатынан уонна да атын өрөспүүбүлүкэтээҕи литература күрэхтэрин бириэмийэлэрин ылбыта. Кыайыы 60 сылыгар анаммыт күрэххэ «Бэкирээйи» диэн псевдонимынан суруйбут «Ветеран кэс тыла» диэн кэпсээнэ I бириэмийэҕэ тиксибитэ[2].

Айымньылара «Чолбон», «Күрүлгэн» сурунаалларга, «Таатта», «Кыым» хаһыаттарга, үөрэх кинигэлэригэр уонна хомуурунньуктарга бэчээттэммиттэрэ.

2009 сыллаахха «Өрүс бөрөтө» арамаана Таатта улууһун бастыҥ айымньытынан ааттаммыта[1]. Олоҕун тиһэх күннэригэр «Олорор силискин кэрдимэ» диэн арамааны суруйбута.

Библиографията

  • «Суол тоҕойугар» (1988, хомуурунньукка киирбит)
  • «Дьол икки утаҕа» (1992)
  • «Таабырын кэпсээннэр» (1995)
  • «Кустук» (1996, хомуурунньукка киирбит)
  • «Сардаҥа курдук ыраастык олор» (1999)
  • «Олох иһин охсуһуу» (2001)
  • «Оборчоҕо оботторуу» (2006)
  • «Өрүс бөрөтө»
  • «Олоххо бэлэмнээх буол»

Наҕараадалара уонна ытык ааттара

  • Арассыыйа Суруйааччыларын сойууһун чилиэнэ;
  • Педагогическай үлэ бэтэрээнэ;
  • «Таатта улууһун сайдыытыгар киллэрбит кылаатын иһин» бэлиэ.

Дьиэ кэргэнэ

  • Аҕата — Фёдор Иванович Постников;
  • Ийэтэ — Ульяна Степановна Постникова (Тарабукина);
  • Кэргэнэ — Клара Степановна Постникова;
  • Уола — Александр Фёдорович Постников — Сындыыс[1], суруйааччы, суруналыыс, учуутал[3].

Быһаарыылар

  1. ↑ 1 2 3 4 АЙЫЛҔАНЫ КЫТТА СИТИМНЭЭХ СҮӨДЭР АРЧЫ (рус.). МКУ "Таттинская МЦБС". Сигэнии күнэ: 28 От ыйын 2026.
  2. ↑ 1 2 Постников Федор Федорович-Сүөдэр Арчы (рус.). Усть-Таттинская сельская библиотека-филиал №19. Сигэнии күнэ: 28 От ыйын 2026.
  3. ↑ Постников Александр Федорович — Сындыыс — МКУК "Таттинская МЦБС"(биллибэт). taattalib.ru. Сигэнии күнэ: 28 От ыйын 2026.

Категориялар