Ангам күнэ
Ангам күнэ — алтынньы 26 күнүгэр бэлиэтэнэр Науру Өрөспүүбүлүкэтигэр бырааһынньыга. Бу күн Науру олохтоохторо арыы нэһилиэнньэтэ колонизацияламмытыттан ыла аан бастаан 1500 киһиэхэ тиийбит күнүн бэлиэтииллэр (бу ахсаан омук тыыннаах хааларыгар ирдэнэр ахсаанынан ааҕыллыбыта). Науру устуоруйатыгар, ирдэнэр ахсаан бэлиэтиитэ икки түбэлтэтэ баар: 1932 уонна 1949 сылларга.
1923 сыллаахха Аан дойду бастакы сэриитин кэнниттэн, Науру Омуктар Лигаларын мандатнай территориятын статуһун ылбыта уонна Улуу Британия, Австралия уонна Саҥа Зеландия холбоһуктаах дьаһалталарыгар киирбитэ, ол гынан баран дьаһалтанан хонтуруолу Австралия ыыппыта (арыы урут Германия импиэрийэтин холуонньата). Сэрии бүппүтүн кэннэ, 1919 сыллаахха Австралия дьаһайааччыта Гриффит Науруга биэрэпис ыыппыта. Кэлин, олохтоох баһылыктары кытта көрсүһүүгэ, Гриффит арыы нэһилиэнньэтэ улаханнык аҕыйаҕын уонна наурулар омук буолуохтарын баҕарар буоллахтарына, Науру нэһилиэнньэтэ кырата 1500 буолуохтаах диэн эппитэ. Ону тэҥэ нэһилиэнньэ ахсаана бу сыыппараҕа тиийбит күнэ Ангам күнэ (Үөрүү күнэ) диэн ааттанан, өрөбүл күн буолара быһаарыллыбыта. 1500-с буолбут оҕо Ангам оҕотунан биллэриллэн сыаналаах бэлэхтэри, ытыктабылы ылыаҕа.
Биэрэпис кэнниттэн уон үс сыл буолан баран, арыы нэһилиэнньэтин ахсаана 1500 киһиэхэ тиийбит. Ангам бастакы оҕото 1932 сыл алтынньы 26 күнүгэр төрөөбүтэ. Эидаруво (наур. Eidegenegen Eidagaruwo) диэн ааттаах кыыс этэ. Ол гынан баран, Аан дойду иккис сэриитин кэмигэр Науру нэһилиэнньэтэ эмиэ кутталлаах таһымҥа түспүтэ. Сэрии кэмигэр Трук (билигин Чуук) арыытыгар 1201 науру олохтоохторо көһөрүллүбүттэрэ, олортон 737 эрэ киһи дойдуларыгар төннүбүтэ. Ангам бастакы оҕото үксүн эвакуацияламмыт дьон курдук Науруга төннөр кыаҕа суох этэ, тоҕо диэтэххэ кини Трукка аһылык тиийбэтиттэн уонна ыарыыттан, эбэтэр тропическай грануломаттан өлбүтэ.
Ангам иккис оҕото Адам диэн уол (наур.Bethel Enproe Adam), 1949 сыллаахха кулун тутар 31 күнүгэр Боэ уокуругар төрөөбүтэ. Адам Эидарувоны кытта биир күҥҥэ төрөөбөтөҕүн да, олохтоохтор син биир Ангам күнүн алтынньы 26 күнүгэр бэлиэтииллэр.